پشتی کو بەرییا نها هاتنا گەشتیاران بۆ پاڕێزگەها دهۆکێ هاتبوو قەدەغەکرن و رێکارێن توند هاتبوونە گرتن ل بەر هاتنا گەشتیاران، د نها دا ب مەرج گەشتیار دشێن سەرەدانا پاڕێزگەها دهۆکێ بکەن.
رێوار محەمەد رەشید، پەیڤدارێ رێڤەبەرییا گشتی یا گەشتوگۆزارێ ل پارێزگەها دهۆکێ تایبەت بۆ خانی نیوز راگەهاند: گەشتیارێن ئیراقێ دشێن ب مەرج بهێنە پارێزگەها دهۆکێ ئەو مەرج ژی ئەون کو دڤێت پشکنینێن وان یێن ڤایرۆسێ کۆرۆنایێ پێ بن و ئەنجامێن پشکنینان نێگەتیڤ بن و ب مەرجەکی 72 دەمژمێران ل سەر پشکنینا وان دەرباز نە ببیت.
گۆت ژی، ئەڤە ژی پشتی وێ یەکێ یە کو د هەمی هەلکەفتان دا ڕێڤەبەرییا گشتییا گەشت و گوزارێ ل پارێزگەها دهۆکێ پلانێن باش د دانیت بۆ وێ چەندێ کو ب باشترین شێوە پێشوازی ل گەشتیاران بهێتە کرن، ژبەر ڤێ چەندێ د ڤێ نەورۆزێ ژی وان پلانەکا باش دانایە و 15 تیم پێک ئیناینە و ئەڤ تیمە دێ ل زالگەهێن سەرەکی یێن کو گەشتیار سەرەدانا د ناڤ دا دهێنە پارێزگەها دهۆکێ راوەستن و دێ شریناهییان و پرۆشەران و نەخشەیێ پارێزگەها دهۆکێ ل سەر گەشتیاران بەلاڤکەن، و چەندین لافیتەیێن بخێرهاتنێ دێ هێنە هەلاویستن و دێ کیسێن گلێشی و بەرمایکان هێنە بەلاڤکرن ل سەر خەلکی دا کو جهێن گەشتیاری و سەیرانان بهێنە پاراستن.
رێوار محەمەد رەشید راگەهاند ژی، نڤیسینگەهێن وان یێن تایبەت ب دانا زانیارییان ل جهێن گەشت و گۆزاری یێن قەزایێن ئاکرێ و زاخۆ و شێخان و ئامێدیێ هێنە دانان دا کو زانیارییان ب گەشتیاران بدەن.
ناڤبری ل دووماهییێ ژی گۆت، کو ئەو دناڤبەرا رۆژانێن 18-3-2021 تا 25-3-2021 پێشبینییا هاتنا 15 هزار گەشتیاران دکەن بۆ ناڤ پارێزگەها دهۆکێ، گۆتژی کو ل پارێزگەها دهۆکێ جهێ ڤەحەویانێ بۆ زێدەتری 15 هزار گەشتیاران هەیە کو ئەوژی 110 جهێن ڤەحەویانێ نە و ئەو بەردەوام رێنمایی و چاڤدێریا تایبەت ب وان جهان دکەن و ل دووڤ رێنمایێن وان سەرەدەری دگەل گەشتیاران دهێتەکرن، و هەر جهەکێ کو پێگیریێ ب رێنمایان نەهێتەکرن دێ ل دووڤ یاسایێ سەرەدەریێ دگەل کەن.
