رۆژا جیهانییا شانۆیێ یه‌ و دهۆك بێ هۆلا شانۆگه‌ریێ یه‌

27ی ئادارا هه‌ر ساله‌كێ ل هه‌موو وه‌لاتێن جیهانى رۆژا جیهانێیا شانۆیێ ب چه‌ندین چالاكیێن جودا دهێته‌ ساخكرن.

دژوار سه‌لمان خالد، رێڤه‌به‌رێ هونه‌رێ شانۆیێ ل دهۆكێ، ئه‌ڤرۆ بۆ خانى نیۆز گۆت: ب هه‌لكه‌ڤتا رۆژا جیهانى یا شانۆیێ سوباهى دێ دوو چالاكى ل پارێزگه‌ها دهۆكێ هێنه‌ ئه‌نجامدان، ب ڤى ره‌نگى ده‌مژمێر 11 و نیڤی سپێدێ دێ سمیناره‌ك بۆ پ.د. ئیبراهیم ئه‌حمه‌د سمۆ هێته‌ رێكخستن، چالاكیا دووێ ژی ل ده‌مژمێر 12 نیڤرۆ شانۆگه‌ریا بیردانك ژ ده‌رهێنانا مه‌سعود عارف كو ب شێوێ مۆنۆ درامایه‌ و ب ئه‌كته‌ریا سیار ته‌یب دهێته‌ پێشكێشكرن.

رێڤه‌به‌رێ هونه‌رێ شانۆیێ ل دهۆكێ ئه‌و ژى گۆت: هه‌تا سالا 2014 شانۆ ل كوردستانێ ب گشتى و پارێزگه‌ها دهۆكێ ب تایبه‌تی یا خورت بوو و دووڤ دا لاواز بوویه‌ و ئه‌گه‌ر ژى ئه‌ڤ كاودانه‌ بووینه‌، شه‌رێ داعش بوویه‌، قه‌یرانا دارایى و په‌ژیكا كۆرۆنایێ، لێ مه ‌باوه‌رى هه‌یه‌ ل سالا داهاتى دێ شانۆ كه‌ڤیته‌ سه‌ر پێن خوه‌.

ل دۆر ئاریشا شانۆیێ ژى ناڤبرى گۆت: ئاریشا شانۆیێ ل دهۆكێ ب تنێ مه‌ هۆله‌كا شانۆیێ هه‌یه‌ و ئه‌ڤه‌ ژى ب تنێ به‌ز نینه‌، هونه‌ر ل سه‌ر بنیاتێ دروستكرنا گرۆپان پێش دكه‌ڤیت، گرۆپێن هونه‌رى نوكه‌ هه‌رئێك ژووره‌كێ ڤه‌یه‌ و پێدڤى بوو هه‌ر گرۆپه‌كى شانۆ یا خوه‌ و ئاڤاهیێ خوه‌ هه‌با، نوكه‌ دێ گرۆپه‌ك شانۆیه‌كێ كه‌ت چ جهـ نینن ئه‌وى دیكور و ئه‌و تشتى راكه‌تن، به‌لكو ئه‌و هه‌مى كه‌ل و په‌ل دهێنه‌ هاڤێتن و شانوگه‌رى ژى ب هه‌مان شێوه‌ دێ چیتن.

دژوارى ئه‌و ژى ئاشكراكر كو هۆلا محه‌مه‌د عارف جزیرى ژى ب كێر شانۆیان ناهێت چنكو نه‌ ل دووڤ ستاندارێن جیهانى یه‌ كو تایبه‌ته‌ ب هونه‌رێ شانۆیێ ڤه‌، مه‌ سه‌ردانا وه‌لاتێن پێشكه‌ڤتى كرینه‌ هۆلا شانۆیێ ژ 80 كورسیكان زێده‌تر تێدا نه‌بوون، ده‌پێ شانۆیێ پێنچ ب چار بوو، وه‌كى هۆل ل سه‌ر بنیاتێ شانوویى دهێته‌ دروستكرن دڤێت گه‌له‌ك جێوازى هه‌بن ژ هۆله‌كا دى و ده‌نگ نه‌هێته‌ دزین، هولا محه‌مه‌د عارف جزیرى یا كۆر و سمینارانه‌ نه‌ یا شانۆیانه‌.

 

خانى نیۆز، سالار محه‌مه‌د دۆسكى