ب هه‌لكه‌فتا بوورینا 30 سالان ل سه‌ر دروستكرنا ده‌ڤه‌را دژه‌فرینێ ل هه‌رێما كوردستانێ كونسلخانا ئه‌مریكا په‌یامه‌ك به‌لاڤكر و راگه‌هاند، د رۆژه‌كا وه‌كی ئه‌ڤرۆ دا ل سالا 1991ێ، ئه‌مریكا هاریكاربوو د دامه‌زراندنا ده‌ڤه‌را ئارام دا ب رێیا سه‌پاندنا ده‌ڤه‌را دژه‌فرینێ ل سه‌ر هێلا 36 ل ئیراقێ بۆ پشتراستكرنا سلامه‌تییا گه‌لێ كورد.
كونسلخانا ئه‌مریكا ئاشكرا كر، ئه‌مریكا پێگیریا خوه بۆ پشته‌ڤانییا گه‌لێ كورد دوپات دكه‌ت و دێ ل سه‌ر پشته‌ڤانیكرنا هه‌رێما كوردستانا بهێز د چارچووڤێ ئیراقا فیدرال دا به‌رده‌وام بیت.
پشتی سه‌رهلدانا ئادارا سالا 1991ێ، نێزیكی ملیۆنه‌ك و 500 هزار كه‌س ژ خه‌لكێ باشوورێ كوردستانێ ژبه‌ر گه‌فێن حكومه‌تا ئیراقێ به‌ر ب سنۆرێن توركیا و ئیرانێ چوون، ئه‌ڤ یه‌كه ژی بۆ ئه‌گه‌ر ل 5ی نیسانا سالا 1991ێ جڤاتا ئاساییشێ ب بریارا ژماره 688 هه‌رێما دژه‌فرینێ ل سه‌ر هێلا 36 یا پانییێ ل باشوورێ كوردستانێ دروست كر بۆ پاراستنا گه‌لێ كورد.
