جێگرێ سه‌رۆكێ حكومه‌تا هه‌رێما كوردستانێ به‌رێ بنیاتى بۆ پرۆژێ ئاڤاكرنا كارگه‌ها شه‌كرێ ل بیتوێن ل سنۆرێ ئیداره‌یا راپه‌رین دانا و رێڤه‌به‌رێ كۆمپانییا جێبه‌جێكار ژى راگه‌هاند، ئه‌ڤ پرۆژێ ستراتیژى دێ كه‌رتێ چاندنێ ب پیشه‌سازى كه‌ت، ژبه‌ركو ژبلى هاندنا جوتیاران و كارئاسانكرنا چاندنا سلكان، رۆژانه 5000 ته‌نێن سلكان ژ جوتیاران دهێنه وه‌رگرتن و 600 ته‌نێن شه‌كرێ به‌رهه‌م د ئینن.
لوقمان قەمتەرانی، رێڤه‌به‌رێ کۆمپانییا ئابورلاند د رێوره‌سمێن دانانا بە‌رێ بنیاتێ پرۆژێ كارگە‌ها شە‌كرێ بیتوێن راگەهاند، ژبه‌ر گونجاندنا سروشتێ ده‌ڤه‌را راپه‌رین بۆ چاندنا سلكان، گه‌هشتنه وى ئه‌نجامى كو سروشتێ كوردستانێ ب گشتى و سنۆرێ وێ ب تایبه‌تى بۆ دو وه‌رزێن چاندنا سلكان د ساله‌كێ دا گونجایه.
قوباد تاله‌بانی، جێگرێ سەرۆكێ حكومەتا هەرێما كوردستانێ راگەهاند، ئەڤ پرۆژە ستراتیژییە و حكومەت ب تنێ نه‌شێت هەموو كاران بكه‌ت، ژبه‌ر هندێ هه‌كه خه‌لكه‌كێ دى هه‌بیت باشتر ژ حكومه‌تێ پرۆژان بجهبینیت كاره‌كێ باشه و دێ ده‌رفه‌تێ ژى ده‌نه كه‌رتێ تایبه‌ت، وه‌كو حكومه‌ت دێ گرنگییا زێده‌تر ب وه‌به‌رهێنانا ستراتیژى ده‌ن.
قوباد تاله‌بانى، ئاماژه كر، ب ڤان پرۆژان دێ زانكۆیان ب بازاری ڤه گرێده‌ن و ب هزاران ده‌لیڤێن كارى بۆ خه‌لكى په‌یدا كه‌ن، حكومه‌تێ ژى پرۆژه‌یێن دى یێن چاندنێ هه‌نه و پشتى په‌سه‌ندكرنا بودجه‌ى و ئاماده‌كاریێن بودجا كوردستانێ، دێ زێده‌تر ده‌لیڤێن كارى هه‌بن.
