فەلاح مستەفا: کوردستان وەکو یاریکەرەک ل سەر سیاسەتا ناڤدەولەتی کارێن خوە دکەت

شیرەتکارێ بلندێ سەرۆکێ ھەرێما کوردستانێ بۆ کاروبارێن دەرڤە د داخویانییەکێ دا بۆ خانی نیوز ل دۆر پەیوەندیێن ھەرێما کوردستانێ د گەل دەرڤە گۆت: ھەرێما کوردستانێ پەیوەندیێن ب ھێز و ھەڤپشک د گەل جڤاکا ناڤدەولەتی ھەنە و ئەو پەیوەندییە ژی د شەڤ و رۆژەکێ دا نەھاتینە دروستکرن، بەلکو بۆ بەرییا سالێن ١٩٩٠ و پشتی سەرھلدانا کوردستانێ و سالا ٢٠٠٣ و نەمانا رژێما پێشتر یا ئیراقێ ڤەدگەرن، وان پەیوەندییان شێوەیەکێ دامەزراوەی وەرگرت و قۆناغەکا نوو یا پەیوەندییان د چارچۆڤێ ئیراقێ دا و ل سەر بنەمایێن دەستووری یێن ئیراقێ وەکو ھەرێمەکا فیدرال ئەوان کاران دکەت، ھەروەسا ھەبوونا ھنارتی و دیبلۆماتکارێن وەلاتان ل ھەرێما کوردستانێ و ھەبوونا ١٤ نوونەراتیێن ھەرێمێ ل وەلاتێن دەرڤە، ئەو ب خوە وێ یەکێ خویا دکەت کو ھەرێما کوردستانێ وەکو یاریکەرەک ل سەر سیاسەتا ناڤدەولەتی کارێن خوە دکەت.
‎شیرەتکارێ بلندێ سەرۆکێ ھەرێما کوردستانێ بۆ کاروبارێن دەرڤە ل دۆر
‎رۆلێ وەلاتێن ئەرەبی د پاشەرۆژێ دا دیارکر، ھەرێما کوردستانێ سوپاسییا وان وەلاتێن ئەرەبی دکەت کو نھا ل ھەرێمێ نە و پێشتر ژی ٧ وەلات ل ھەرێمێ بوون، لێ وەلاتێ سوودانێ ژ بەر رەوشا ئابووری و سیاسی ب شێوەیەکێ دەمکی کونسلخانەیا خوە داخستینە، نھا ٦ وەلات لێ نە و وەلاتێ قەتەرێ د قۆناغا ڤەکرنا نوونەراتییا خوە دایە ل ھەرێمێ، ب واتەیەکا دی ھەرێما کوردستانێ خوازیارە پەیوەندیێن خوە دگەل وەلاتێن ئەرەبی پێشبێخیت و ب رایا وان ھەبوونا وەلاتێن ئەرەبی ل ھەرێم و ئیراقێ ھاریکارە تاکو پەیوەندیێن خوە ئاسای بکەن، گەلەک گرنگە تێگەھشتنەکا باشتر ژ ھەرێما کوردستانێ و ئەزموونا وێ ھەبیت ژ ئالیێ وەلاتێن ئەرەبی، لەورا ئەو پشتەڤانییا ھەبوونا وەلاتێن ئەرەبی ل کوردستانێ دکەن.
‎فەلاح مستەفا ئەو یەکە ژی ئاشکەرا کر،‌ وەزیرێ دەرڤە یێ قەتەرێ د سەرەدانا خوە دا بۆ کوردستانێ، بانگھێشتنامەیەک پێشکێشی نێچیرڤان بارزانی، سەرۆکێ ھەرێمێ کربوو کو سەرەدانا وەلاتێ قەتەر بکەت و نێچیرڤان بارزانی خوەشحالییا خوە دیار کر و کەنالێن دبلۆماسی نھا مژوولی دانانا دەمەکێ گونجای نە ژ بۆ سەرەدانا سەرۆکی بۆ قەتەرێ و ئەو وەکو ھەرێم خوازیارن پەیوەندیێن دوقۆلی پێشبخن ژ بەرکو د د بەرژەوەندییا کوردان دا یە.