جڤاتا دادوه‌ری: لێبرینا مووچه‌ی كارتێكرن ل ژیانا دادوه‌ران كرییه‌

دادوه‌ر بتنێ پشت به‌ستنێ ل سه‌ر كارێ خوه‌ دكه‌ن و ل دووڤ یاسایێ چێنابیت چ كارێن دى بكه‌ن

سه‌رۆكێ جڤاتا دادوه‌رییا هه‌رێما كوردستانێ رادگه‌هینیت، كو بریارا لێبرینا 50% یا مووچه‌یێ دادوه‌ران بارگرانییه‌كا زۆر خستییه‌ سه‌ر ملێن دادوه‌ران و هه‌ڤشێوه‌یێ وان ژى پله‌یێن تایبه‌ت سه‌ره‌ده‌رى دگه‌ل وان دهێته‌ كرن، ژبه‌ر هندێ داخواز ژ سه‌رۆكێ حكومه‌تێ كرییه‌، كو چاڤخشاندنه‌كێ د مووچه‌یێ دادوه‌ران دا بكه‌ت كو هژمارا وان 408 دادوه‌ر و داواكارێن گشتی نه‌.

جڤاتا دادوه‌رییا هه‌رێما كوردستانێ د نڤیساره‌كێ دا، كو ئه‌ڤرۆ ئاراسته‌یى نڤیسینگه‌ها سه‌رۆكێ حكومه‌تا هه‌رێما كوردستانێ هاتییه‌ كرن، و ئاماژه‌ دایه‌ ژى، كو دادوه‌ران و ئه‌ندامێن داواكارییا گشتى ئه‌ركه‌كێ قورس ل سه‌ر ملێن وانه‌ و بریارا لێبرینا 50% مووچێ وان بوویه‌ جهێ رازینه‌بوونێ، چونكى هه‌ڤشێوه‌یێ پله‌یێن تایبه‌ت هاتینه‌ هژماركرن و د ده‌مه‌كیدایه‌ كو ئه‌وان به‌رپرسیاره‌تییا قورس ل سه‌ر ملێن وان نینه‌.

ئه‌و ژى هاتییه‌، كو دادوه‌ران بۆ ژیارا خوه‌ یا رۆژانه‌، ب تنێ پشت به‌ستنێ ل سه‌ر مووچه‌یێ خوه‌ دكه‌ن، و د نوكه‌ دا ره‌وشا ژیارا وان یا خرابه‌، چونكى یاسایێ قه‌ده‌غه‌كرییه‌ كو كاره‌كێ دى بكه‌ن، ژبه‌ر هندێ داخواز دكه‌ن كو سه‌رۆكێ حكومه‌تێ پێداچوونێ بكه‌ت د مووچێ دادوه‌ران و رێك پێ نه‌هێته‌ دان، ب ڤى شێوه‌یى سه‌ره‌ده‌رى ب ژیانا دادوه‌ران بهێته‌ كرن.