دادگه‌ها مافێ مرۆڤى ل ئه‌ورۆپا ئه‌ڤرۆ دێ بریارێ ل دۆر دۆسه‌یا هه‌ڤسه‌رۆكێ پێشتر یێ پارتییا دیمۆكراتیك یا گه‌لان هه‌ده‌پێ ده‌ت.
سه‌لاحه‌ددین ده‌میرتاش د چارچووڤێ لێكۆلینێن تیرۆرێ دا ژ رۆژا چارى چریا دویێ یا سالا دوهزار و شازدێ ژ ئالیێ حكومه‌تا توركیا ڤه هاتیه ده‌سته‌سه‌ركرن و نێزیكى چار سالانه د زیندانا باژارێ ئه‌درنه دایه.
ماهسونى كارامان، پارێزه‌رێ سه‌لاحه‌ددین ده‌میرتاشى راگه‌هاند، ئه‌و چاڤه‌رێ نه ئه‌ڤرۆ رۆژا سێشه‌مبى دادگه‌ها مافێ مرۆڤى ل ئه‌ورۆپا بریاره‌كا توند ل سه‌ر وێ دۆسه‌یێ بده‌ت و توركیا پێگیر بكه‌ت بریارا ئازادكرنا ده‌میرتاشى بجهبینیت.
دادگه‌ها مافێ مرۆڤى ل ئه‌ورۆپا پێشتر ل رۆژا بیستى چریا دویێ یا سالا دوهزار و هه‌ژدێ بریارا ئازادكرنا ده‌میرتاشى دا بوو، لێ دادگه‌ها توركیا ل رۆژا چارى كانوونا هه‌مان سال دۆسه‌یه‌كا دى ب تۆمه‌تا پرۆپاكندان بۆ په‌كه‌كێ ل سه‌ر وى ڤه‌كر و بریارا زیندانكرنا وى دا و ب وێ یه‌كێ بریارا دادگه‌ها مافێ مرۆڤى ل ئه‌ورۆپا نه‌هات بجهئینان.
