خه‌لكێ نه‌ینه‌وا یێن ل سالا 2014 ئاواره‌ى هه‌رێمێ بووین و ل كه‌مپێن هه‌رێمێ ئاكنجى بووین، تا نها نه‌شێن ڤه‌گه‌رنه‌ڤه.
ل سالا 2014 و ژ ئه‌گه‌رێ هێرشێن تیرۆرستێن داعشێ بۆ سه‌ر باژێرێ مووسل، هه‌ژماره‌كا مه‌زن یا خه‌لكێ وى باژێرى ئاواره‌ى هه‌رێما كوردستانێ بوون و ل كه‌مپا ماملیان ل ئاكرێ هاتنه ئاكنجى كرن، لێ تا نها ژ ئه‌گه‌رێ ترسا تیرۆرێ ل وێ ده‌ڤه‌رێ نه‌شێن ڤه‌گه‌رنه سه‌ر مال و حالێن خۆه.
عه‌لى، ئاواره‌یه‌كێ ده‌شتا نه‌ینه‌وایه ل كه‌مپا ماملیان ل ئاكرێ بۆ خانى نیوز راگه‌هاند، ئه‌و حه‌زدكه‌ن ڤه‌گه‌رنه ده‌شتا نه‌ینه‌وا و ژیانه‌كا خۆش ده‌ربازبكه‌ن، لێ ده‌مێ ئارامى نه‌بیت، ژیانا بن خیڤه‌تێ خۆشتره.
محیه‌دین محه‌مه‌د، ئاواره‌كێ دیتر یێ ده‌شتا نه‌ینه‌وایه و نها ل كه‌مپا ماملیان ل ئاكرێ ئاكنجى یه بۆ خانى نیوز راگه‌هاند، ئه‌و د گه‌ل هه‌ژماره‌كا دى یا مالباتان ل ده‌مێ شه‌رێ داعشێ ئاواره‌ی كوردستانێ بوون، تا نها ل بن خیڤه‌تان ماینه ل كه‌مپێ، ئه‌و دخوازن ڤه‌گه‌رنه‌ڤه لێ ژبه‌ر نه‌بوونا خزمه‌تگوزارییان و نه‌بوونا ئارامیێ ئه‌و نه‌شێن ڤه‌گه‌رن.
ژ ئالیه‌كێ دی ڤه، مه‌سیحیێن ده‌شتا نه‌ینه‌وا گازنده‌یان ژ هه‌بوونا حه‌شدا شه‌عبی دكه‌ن و دخوازن پێشمه‌رگه ڤه‌گه‌رنه‌ڤه و پاراستنا وان بكه‌ن.
سه‌فا چیچوو، چالاكڤانێ مه‌سیحیی ل ده‌شتا نه‌ینه‌وا بۆ خانی نیوز راگه‌هاند، پشتى داعش ب دوماهیك هاتى ل ده‌شتا نه‌ینه‌وا، تا نها هنده‌ك گوند و كۆمه‌لگه‌هێن مه‌سیحیان نه‌هاتینه ئاڤه‌دانكرن .
گوت ژى: ل هنده‌ك ده‌ڤه‌رێن مه‌سیحى زڤرینه‌ڤه سه‌ر ده‌ڤه‌رێن خوه پیشمه‌رگه ل ده‌ڤه‌رێن وان هه‌نه، هه‌كه پێشمه‌رگه پاراستنا مه‌سیحیان نه‌كه‌ت ل ده‌شتا نه‌ینه‌وا، ب ئێكجارى دێ مالێن خوه چوولكه‌ن و به‌ر ب كه‌مپا ڤه زڤرن.
دوپات ژى كر: هه‌كه هێزێن پیشمه‌رگه‌ى نه‌ڤه‌گه‌رنه ڤه سه‌رجهێن خوه، خێزانێن مه‌سیحى ئارام نابن و ترس هه‌یه بمینه ل ده‌شتا نه‌ینه‌وا.
