د گەل کێمبوونا دەرفەتێن کاری چەندین پەیچ و رێکخراوێن نەحکومی پەیدابووینە کچەک ژی دبێژیت: ئەو بوویە قوربانیا ئێک ژ وان پەیچان.
کچەک دبێژیت: ژ بۆ دەستکەفتنا کاری من سەرەدانا ئێک ژ رێکخراوان کر کو دەلیڤێن کاری بەلاڤکربوون، لێ ئەو ژلایێ وان ڤە ھاتە خاپاندن و وێنێن وێ کەفتنە دەستێن وان دا ژ ترسا هندێ دا خێزانا من نەزانیت ھەر داخوازیەکا دکر بۆ وان ب جھـ دئینا ھەتا ژیانا من رەش بووی.
گرین عه‌بدولره‌حمان، بەرپرسا ناڤەندا تەناھی یا ئێكه‌تییا ئافره‌تێن كوردستانێ بۆ خانی نیوز گۆت: ل ده‌مێن بوورى گەلەک پەیچ و رێکخراوێن نە تۆمارکری پەیدابووینە ب ھێجەتا دەلیڤێن کاری بزاڤان دكه‌ن پێزانینێن وان بدەست ڤە بینن و گەلەک جاران داخوازا وێنان ژێ دکەن یان ژی بزاڤان دكه‌ن دەستدرێژیێ بکەنە سەر، پاشان گەف ل وان ژنان دھێنە کرن و ھەر داخوازییەکا ژ وان دھێتە کرن نه‌چار دبن ب جھ بینن، گەلەک کچان سەرەدانا وان کرییه کو ھاتینە خاپاندن ژلایێ پەیچان ڤە، ئاریشا وان گەھاندیە جھێن بەرپرس و ھاتیە چارەکرن ب رێکێن قانوونى، لەورا گەلەک گرنگە دەمێ ژن ب رێکا ڤان پەیچان یان رێکخراوان بزاڤێ دكه‌ن ببنە خودان کار، پێدڤییه پێزانین ل سەر ھەبن پاشان سیڤیێ خو پێشکێش بکەن یان بچیتە دیدارا کاری.
گرین عه‌بدولره‌حمان گۆت ژی: گەلەک گرنگە چاڤدێری ژ لایێ حکومەتێ ڤە ل سەر ڤان رێکخراوان و پەیچان ھەبیت دا ب ڤان رێکان خەلک نەھێتە خاپاندن، ژبه‌ركو دەلیڤێن کاری کێمبووینە و خەلکەک ژی نه‌چار بوویە پەنایێ ببەتە بەر ڤان پەیچ و رێکخراوان بۆ بدەستڤەئینانا کاری.
خانی نیوز، مەنیجا ئەیوب
