یا خوەیایە کو ھەبوونا بارەگا و ڤەشارتگەھێن گهریلایێن پەکەکێ ل دەڤەرێن جودا جودا یێن ھەرێما کوردستانێ بوینە خالا ناکوکی و مەیدانا جەنگێ لەشکرێ تورکیا دگەل پارتا ناڤھاتی نەخاسمە دنھا دا کو وەک بھانەیەک ژلایێ تورکیا ڤە دھێتە بکارئینان بو لەشکەر کێشی و بجهکرنا بنگەھێن سەربازی ل وان جھان بکار دھێت، ھەلبەت ئەڤێ ستراتیجیێ رەھەندێن خوە یێن كوير و دوور ھەنە و پشتەڤانيەکا بھێزا لوجستی بو دھێتە کرن دبیت ئارماجێن گشتگیر ژ وان گھورینین وێنەیێ توخیبان و بەرفرەھ کرنا جیوپولێتیکی و پاشان ب بورینا دەمی یێن دیموگرافی و گھورینێن شوناسا وان دەڤەران لپشت خوە ھەبن ژلایێ ناڤخوویی ژی ڤە بویە ئەگەرێ چولکرن و مشەخت بوونا بەشەکێ زور ژ خەلکی ژ جھ و وارێن وان و گەھاندنا زیانێن گیانی و مادی و ژناڤ چوونا بەرھەم و داھات و ژینگەھا سروشتی و ئاژەلێن ههڤوهلاتیان کو بەشەک زۆر خەلکێ وان گوندان لسەر دەرامەتێ خوە دژیان زێدەباری پەیدا کرنا ژینگەھەکا ئالوزا سیاسی و نە سەقامگێر ژ لایێ ئێمناھی ڤە کو کو بەربەست د رێیا حکومەتێ ژ گەھاندنا جادە و بان و ئاسانکاریێن ژیانا ههڤوهلاتیان گوندان و ھەروەسا زیان ژ بلی کەرتێ چاندن و ئاڤەدانی و ئاژەلداریێ دگەھینیتە گەشت و گوزار کو وەک ژێدەرەکێ ژین و ژیارا خەکی یە ل وان دەڤەران .
بێ گومان ڤێ ھاوکێشە کارڤەدانێن نەرێنی بۆ قەوارێ سیاسی و دهستوریێ ھەرێما کوردستانێ ھەنە و مەترسیا راستەقینە لسەر دەست کەفتێن گەلێ کورد کو ب درێژاھیا دیرۆکی شورهش و قوربانی ژ بو داینە ئەڤە ل دەمە کی یە کو جڤاکێ ناڤدەولەتی و حکومەتا ئیراقی بێدەنگیەکا رێژەیی ھەلبژارتیە ل ھەمبەر ڤان پێشێلکاریێن دهستوری و مروڤی ل سنورێت ھەرێمێ لێ پسیارا ھەرە گرنگ ئەڤە یە ئایا پەکەکە لژێر کارێگەریا فشارا دەرەکی و ھەرێمی دایە ژبو پەیادەکرنا بەرژەوەند و ئەجندایێن وان یان ژی دەرئەنجامێ ئایدلوژیەکا بەرتەسکا خوە زالکرنێ ڤی رولێ ھەنێ ل دەڤەرێ دگێریت؟
ديسان و سەرەرای ھەمی دەست درێژی و لڤلڤینێن شاش ژ لایێ پەکەکە ڤە ب خاندنا من سەرکردایەتیا کوردی ل ھەرێمێ تا نوکە زۆر ب ھەستیاری و ب ھەناسەکا ژیرانە رەفتارا دگەل ھێمن کرن و ئاسایی کرنا بارودوخی دا کریە و یا دمینیت ئەوە کو پەکەکە ژی تارادەکی ل ھێلا نەتەوایەتی ب زڤریت و بیر د وێ چەندێ دا بکەت کو ھەر شکەستەک و لاوازبونەک وانەیەکە و دڤێت پێداچوون د رێرەوا گشتی دابھێتە کرن ئەگەر نە تێھنا وێ دێ گەھیتە دیروکا بزاڤا رزگاریخوازا کوردایەتیێ…
