كوشتنا چالاكڤانان ل ئیراقێ د چه‌ند هه‌یڤێن بورى ب ره‌نگه‌كێ به‌رچاڤ زێده‌بوویه.
زێده‌باری بارودوخێ خراب یێ ئابوورى ل ئیراقێ، كوشتنا چالاكڤانان د چه‌ند هه‌یڤێن بوورى دا زێده‌بوویه، و بتنێ د ماوێ چار هه‌یڤان دا بیست و نه‌هـ چالاكڤان هاتینه كۆشتن.
ل گوره‌ى ئامارێن رێكخستنان و چالاكڤانان، ژ هه‌یڤا ئابا ئه‌فسال هه‌تا نها، بیست و نه‌هـ چالاكڤان هاتینه كوشتن و بزاڤا كوشتنا سیهـ چالاكڤانێن دى هاتیه دان.
سامر یاسین شه‌مه‌رى، ئه‌ندامێ كومسیونا مافێ مرۆڤى یا ئیراقێ راگه‌هاند، وان تێبینیا ژمارا مه‌زن یا كوشتنا چالاكڤانان كریه، زێده‌بارى ده‌سته‌سه‌ركرنا چالاكڤان و رۆژنامه‌ڤانان كو تا نها چاره‌نڤیسێ گه‌له‌ك ژوان نه‌دیاره.
ژبلى وێ یه‌كێ، چاره‌نڤیسێ چه‌ندین چالاكڤانان نه‌دیاره، ب تنێ د هه‌یڤا بوورى دا، حه‌فت چالاكڤان هاتینه ره‌ڤاندن، هێشتا لایه‌نێن ئه‌منى نه‌شیاینه ب دروستى ریب رى وێ دیاردێ ببن.
عه‌لى تاهر، چالاكڤانێ ئیراقى ئاماژه ب وێ یه‌كێ دا، پێدڤى یه ل سه‌ر حكومه‌تێ ژینگه‌هه‌كا ئارام بوو چالاكڤانان دروست بكه‌ن.
پشتى شه‌ش هه‌یڤان ژ كوشتنا هوشام هاشمى ڤه‌كۆله‌رێ ئیراقى، حكومه‌تێ راگه‌هاند بكوژێن وى به‌ره‌ف ده‌رڤه‌ى وه‌لاتى ره‌ڤینه، نها دگه‌ل هه‌ر خۆه‌نیشاندان یان نه‌رازیبوونه‌كێ، چالاكڤان ریب رى گه‌ف و كوشتنێ دبن.
