یاریزانه‌كێ دهۆكێ داخوازا لێبورینێ ژ هه‌لبژارتیێ عیراقێ كر

 ئاژانسا خانى، هه‌ژار مه‌عروف

ئێكه‌تیا ته‌پا پێ یا عیراقێ ب فه‌رمى داخوازى ژ یانا ئوسترسوند یا سویدی كر بوو یاریزانێ وێ یێ كورد رێوان ئه‌مین كو پشكدارى ل گه‌ل هه‌لبژارتیێ ئێكێ یێ عیراقێ بكه‌ت بۆ یاریێن ڤاڤارتنێن موندیالا جیهانێ ل قه‌ته‌ر.

د داخویانیه‌كێ دا بۆ ئاژانسا خانى رێوان ئه‌مین دیاركر ئێكه‌تیا ته‌پا پێ یا عیراقێ ب فه‌رمى داخوازى پێشكێشى یانا ئه‌وى كرییه‌ بۆ ده‌لیڤه‌یێ بده‌نه‌ وى كو په‌یوه‌ندى ب هه‌لبژارتیێ عیراقێ بكه‌ت ، لێ ئه‌وى داخوازا لێبورینى ژ ئێكه‌تیا ته‌پا پێ یا عیراقێ كر ژبه‌ركو ئه‌و نوكه‌ هنگافتى یه‌ و نه‌ یێ به‌رهه‌ڤه‌ بۆ كرنا یاریێ ئه‌و پێدڤى ب ده‌مى یه‌ هه‌تا ب ڤه‌گه‌ریته‌ دناڤ یاریگه‌هان دا.

هه‌ردیسان رێوانى سوپاسیا ئێكه‌تیا ته‌پا پێ یا عیراقێ و رێڤه‌به‌رێ هه‌لبژارتیێ عیراقێ باسل كورگیس كر و داخوازا سه‌ركه‌فتنێ بوو هه‌لبژارتیێ عیراقێ كر ل ماوێ بهێت و دیاركر ژى هیڤیا وى ئه‌وه‌ ل ماوێ بهێت بشێت یاریێ بۆ هه‌لبژارتیێ عیراقێ بكه‌ت ل قاره‌مانیێن ده‌رڤه‌ پشتى ژ هنگافتنێ ڤه‌گه‌ریت.

هه‌ژى گوتنێ یه‌ ئه‌ڤه‌ بۆ جارا دوێ یه‌ ئێكه‌تیا ته‌پا پێ یا عیراقێ داخوازیا رێوان ئه‌مین كه‌ت لێ ژبه‌ر هنگافتنێ هه‌ردو جاران داخوازا لێبورینێ خواستى یه.‌

رێوان ئه‌مین یێ 25 سالى خه‌لكێ ده‌ڤه‌را سێمێلێ یه‌ و كورێ وه‌رزشڤانێ دێرین پارێزگه‌ها دهۆك ئه‌مین زه‌رو كو رێوان ئه‌مین به‌رى نوكه‌ یارى بۆ یانێن هێرنڤین یا هوله‌ندى و دالكورد یا سویدى كرییه‌ هه‌ردیسان یارى بۆ هه‌لبژارتیێن تازه‌پێگه‌هشتى و لاوێن هوله‌ندا كرییه.‌