نێچیرڤان ئیدریس بارزانی، ل 21ی ئه‌یلولا سالا 1966ێ ل بارزان ژدایك بوویه، جێگرێ سه‌رۆكێ پارتی دیموكراتی كوردستانه و دووه‌م سه‌رۆكێ هه‌رێما كوردستانا ئیراقێ یه پشتی پێكئینانا سه‌رۆكاتییا هه‌رێما كوردستانێ، ل سالا 2005ێ، وه‌ك سه‌رۆكوه‌زیرێن حكومه‌تا هه‌رێمێ ل كابینه‌یێن سیێ، چارێ، پێنجێ، حه‌فتێ و هه‌شتێ كاركرییه.
نێچیرڤان بارزانی ل پشكا زانستێن سیاسی ل زانكۆیا ته‌هرانێ ده‌ست ب خواندنێ كرییه به‌لێ ژبه‌ر چه‌ند ئه‌گه‌رێن سیاسی و تایبه‌تی نه‌شیاییه به‌رده‌وامیێ ب خواندنێ بده‌ت، باوه‌رناما دكتورا فه‌خری ل زانكۆیا واشنتۆن ئه‌ند جێفه‌رسون ل ویلایه‌تا په‌نسلڤانیا یا ئه‌مریكا وه‌رگرتییه.
نێچیرڤان بارزانی خێزانداره و پێنج زارۆ هه‌نه.
ل ده‌مێ ده‌ستهه‌لاتا نێچیرڤان بارزانی وه‌ك سه‌رۆكوه‌زیر، ئاسایشا تاكه كه‌سی و مافێ مرۆڤی و سه‌قامگیریا سیاسی به‌ره‌ف پێشچوونه‌كا به‌رچاڤ بخوه‌ڤه دیت و ب ده‌هان یاسایێن گرنگ سه‌باره‌ت مافێ ئافره‌تێ، ئازادیا رۆژنامه‌گه‌ری و به‌رهنگاربوونا توندوتیژیا خێزانی ده‌رچووینه و رۆله‌كێ سه‌ره‌كی ل پاراستنا بهێزكرنا فره‌ئایینی و فره‌نه‌ته‌وه‌یی و پێكڤه‌ژیانا ئاشتییانه هه‌بوو.
رۆلێ سیاسی یێ نیچیرڤان بارزانی بۆ بهێزكرنا ئاشتی و سه‌قامگیریێ ل ده‌ڤه‌رێ و گرنگیدان و هه‌ماهه‌نگییا هه‌رێمی و ناڤده‌وله‌تی بۆ به‌رهنگاربوونا شه‌ر و تیرۆرێ و چه‌سپاندنا ئاشتیێ بوو ئه‌گه‌ر زێده‌تر ژ (30) وه‌لاتان نوونه‌راتیێن خوه یێن فه‌رمی ل هه‌رێما كوردستانێ ڤه‌كه‌ن.
