میرێ ئێزدییان د په‌یامه‌كێ دا داخواز ژ ئێزدییان كر پشكداریێ د هه‌لبژارتنان دا بكه‌ن و گرنگه مه‌زنترین رێژا ئێزدییان بگه‌هیته په‌رله‌مانی.
حازم ته‌حسین به‌گ، میرێ ئێزدییان و سه‌رۆكێ جڤاتا رۆحانییا ئیزدییان شڤێدی د په‌یامه‌كێ دا راگه‌هاند؛ وه‌لاتێ مه د قۆناغه‌كا سیاسییا گرنگ دا ده‌رباز دبیت و هیڤیێن مه ژی ب سه‌ركه‌فتنا ئه‌زموونا دیموكراسی ڤه گرێدای نه، له‌ورا پشكداریییا ئێزدییان د هه‌لبژارتنێن ئیراقێ یێن 10/10/2021 دا گه‌له‌كا گرنگه و پێدڤییه ئێزدییان ژی شونتبلێن خوه یێن زه‌لال د ڤێ شه‌هیانا جه‌ماوه‌ری دا هه‌بن و ده‌نگێ خوه بده‌ن داكو مافێن وان به‌رزه نه‌بن.
میرێ ئێزدییان دوپات ژی كرییه، گرنگه ئێزدییان پشكدارییه‌كا مه‌زن د هه‌لبژارتنان دا هه‌بیت و مه‌زنترین رێژا سیاسییێن ئێزدی بگه‌هینیته په‌رله‌مانی و ئه‌ڤه ژی د به‌رژه‌وه‌ندییا هێزا داخوازییێن ره‌وا یێن ئێزدییان دایه داكو هه‌موو مافێن خوه بده‌ستڤه بینن.
میر حازم ته‌حسین به‌گ ل داویێ ژی داخوازا سه‌ركه‌فتنێ بۆ هه‌موو به‌ربژاران خواستییه.
