سەرۆکێ فراکسیۆنا پارتییا داد و گەشەپێدانا تورکیا ئاکەپێ ل پەرلەمانێ تورکیا راگەھاند، داخستنا پارتییا دیمۆکراتیک یا گەلان ھەدەپێ چ مفا بۆ تورکیا نابن، بەلێ پێدڤیە دادگەھـ ھەلسەنگاندنێ بۆ وان ھەمی تشتا بکەت یێن ھەدەپە پێ ھاتیە تاوانبارکرن وەکی ھاریکاریکرنا تیرۆریستان.
بۆلەنت تۆران، سەرۆکێ فراکسیۆنا ئاکەپێ، د پرێسکۆنفرانسەکی دا ل دۆر ئەگەرێ داخستنا پارتییا دیمۆکراتیک یا گەلان ھەدەپێ گۆت: داخستنا ھەدەپێ مفا نینە، بەلێ دڤێت ھەلسەنگاندنەک بھێتە کرن کا ھەدەپە پارتەکا سیاسییە و کا دشیان دا ھەیە ھاریکاریا دارایی ژێ بھێتە قوتکرن و وەکی پەیڤدارێ رێکخستنەکا تیرورستی ببینین؟ ئەڤە ھەمی پێدڤیە دادگەھـ ھەلسەنگاندنێ بۆ بکەن و کارێ خۆ بکەن.
سەرۆکێ فراکسیۆنا ئاکەپێ ئاماژە کر: بۆچوونەک ھەیە کو پارێزبەندی ژ سەر ئەندام پەرلەمانێن ھەدەپێ بھێتە راکرن و گەلەک تشتێن دی، ئەو یەک ژی ژ داخستنا وێ پارتێ باشترە.
ل دۆر بڕیارا دادگەھا مافێ مرۆڤی یا ئەورۆپا بۆ ئازادکرنا سەلاحەدین دەمیرتاش، ب بۆچوونا تۆرانی ئەو بریار نەیا قانوونیە بەلکو سیاسیە.
دەمەکە دوبارە د ناڤ لایەنێن سیاسییێن تورکیا و پەرلەمانێ وی وەلاتی دا بەحس ل داخستنا پارتییا دیموکراتیک یا گەلان ھەدەپێ دھێتە کرن و ھەدەپێ ژی بۆ وێ یەکێ پلان ھەنە.
سەرۆکێ فراکسیۆنا ئاکەپێ: داخستنا ھەدەپێ مفا نابیت
