مه‌سرور بارزانی، سه‌رۆكێ حكومه‌تا هه‌رێما كوردستانێ، ئەڤرۆ سێشه‌مبی (18/ 1/2022) پێشوازی ل جەنەرال کارل هاریس، جێگرێ فەرماندێ گشتی یێ هێزێن هه‌ڤپەیمانان ل عێراق و سووریێ کر.
د کۆمبوونەكێدا ره‌وشا گشتی یا عێراقێ و رووبروو بوونا هێرشێن تیرۆرێ هاتنه گوتۆبێژ كرن.
جێگرێ فەرماندێ گشتی یێ هێزێن هه‌ڤپەیمانان ل عێراق و سووریێ، پشته‌ڤانییا هێزێن هه‌ڤپەیمانان بۆ هێزێن پێشمەرگەیی د رووبروو بوونا تیرۆریستێن داعشێ دا دووپاتکر و دیار كر، کو داعش هێشتا گه‌فه‌كا راستەقینەیە ل سەر ئاسایش و سەقامگیرییا عێراق و سووریێ.
هه‌روه‌سا سه‌رۆكێ حكومه‌تا هه‌رێما كوردستانێ، دووپاتی ل گرنگییا ب هێزکرن و بەردەوامبوونا میکانیزمێن هەماهەنگیییا دناڤبه‌را سوپایێ عێراقێ و پێشمەرگەیی دا کرییە، ب تایبەتی ل ده‌ڤه‌رێن کوردستانی یێن دەرڤەیی ئیدارا هەرێمێ بۆ دووماهی ئینان ب هێرشێن تیرۆریستێن داعشێ ب رێیا کاراکرنا سەنتەرێن هەماهەنگییا ئەمنی یێن هه‌ڤپشك و نەهێلانا ڤالاهییا ئەمنی ل وان ده‌ڤه‌ران.
