ئاژانسا خانی: تایبەت
بڕیارە سوبە رۆژا سێشەمبی دادگەھا فیدڕال بڕیارێ ل دۆر رێڤەچوونا ئێکەم کۆمبوونا پەرلەمانێ ئیراقێ بدەت و پەرلەمانتارەکا پارتی ژی ئاشکراکر، ئەگەر بڕیار ل دژی سەرۆک و جێگرێن پەرلەمانی بھێتە دەرکرن دێ رەوشا ئیراقێ ب ئێکجاری تێکچیت.
یادگار مەحموود، ئەنداما فڕاکسیۆنا پارتی ل پەرلەمانێ ئیراقێ بۆ ئاژانسا خانی دیارکر” بڕیارە سوبە رۆژا سێشەمبی دادگەھا فیدڕالی بڕیارێ ل دۆر تانەیا وان کەسان بدەت یێن کۆمبوونا ئێکێ یا پەرلەمانی ب نەدەستووری وەسف کری، بەلێ ئەم پێشبینی دکەین بڕیارا دادگەھێ د بەرژەوەندیا سەرۆک و جێگرێن پەرلەمانێ ئیراقێ بھێتە دەرکرن، چونکە ئێکەم کۆمبوونا پەرلەمانی گورەی پەیڕەوێ نافخۆ ھاتیە رێڤەبرن و چو ئاریشەیێن قانوونی تێدا نەبووینە.
یادگار مەحموود ئاماژەکر” ژبەر ڤێ چەندێ بڕیارا دادگەھێ ھاتە پاشخستن، ھەتا دەلیڤێن زێدەتر بۆ لایەنێن سیاسی ھەبیت بگەھنە رێکەفتنێ لدۆر ئاریشەیێن نوکە ل ئیراقێ ھەی، ژبەرکو ناکۆکیێن زۆر پەیدابووینە و ئاریشە تنێ ل سەر رێڤەچوونا کۆمبوونا پەرلەمانی نینە، بەرۆڤاژی ئەگەر بڕیارا دادگەھێ د بەرژەوەندیا مەحموود مەشھەدانی دەرکەفت ئەڤە دێ کاریگەری لسەر پڕۆسا سیاسی ل ئیراقێ ھەبیت و ئاریشەیێن زۆر مەزن دێ پەیدابن.
