سوبە جەژنا بێلندا ئێزیدیانە و ئەڤرۆ رێ و رەسمێن گورکاگای و خەولێرێ ل ھەموو مالان دێ ھێن گێڕان.
شێخ عەلۆ خەلەف، زانایێ ئۆلا ئێزیدییان بۆ خانی نیوز راگەھاند؛ جەژنا بێلندا ئێزدیان دکەڤیتە مەھا کانوونێ ب ھەژمارا کوردی و ب رێورەسمێن تایبەت ئەڤرۆ ل ئێڤارا جەژنێ دھێن گێڕان و سوبە رۆژا ئەینیێ جەژنە.
شێخ عەلۆ خەلەف خویا ژی کر، بێلندە سێ ئۆغلەمان بخوەڤە دگریت، گورکاگای، ئاگرەکە کو دبەرێ دا دەمێ جۆتیار و گا ژ جۆتی د زڤرین، کابانیا مالێ ئاگر د پێشیا وان دا ھەلدکر و شریناھی و گەنم د سەر ئاگری دا دھاڤێتن دا کو ژ چاڤا بھێتە پاراستن و خێر و بەرەکەت بکەڤیتە د بەرھەمی دا، ئەڤ رێورەسمە ل سەر دەمێ سوومەریان ژی د ناڤا ئێزیدیان دا ھەبوویە و تا نھا بەردەوامە.
ھەروەسا، کابانییا ھەر مالەکێ نانێ سەوکێ چێدکەن و ب بارا مریان و قەستا مریێن خوە ل گۆڕستانێ دکەن و ل وێدەرێ ھەر ئێک نانێ خوە ددەتە یادی تاکو نانێ وان تێکەلی ئێک ببیت و دلێ وان ل یەک خۆشبیت.
ئۆغلەما دویێ دبێژنێ، خەولێرە، نانەکێ تایبەتە ب ھەڤیر و زەیتێ دھێت قەلاندن و مێویژەکێ دکەنە د ناڤ دا ل ئێڤارا جەژنێ ب شەڤ دکەنە پرت و ھەر ئەندامەکێ مالێ پرتەکا نانی دگەھیتێ و ئەو کەسێ مێویژ د بەھرا وی دا بچیت یان کو د ناڤ نانێ وی دا دەرکەڤیت کەسەکێ ب بەختە و رویێ وی یێ خێرێ یە بۆ وێ مالێ، دیرۆکا خەولێرێ ژی دزڤریتە سەر دەمێ شیخادی کو برایێ وی یێ مەزنتر رازی نەدبوو شیخادی مەزناتیێ وەربگریت و ب وێ یەکێ شێخ سەخر، بابێ شیخادی ئەو نانە ب سەر کوڕێن خوە دا بارڤە کر و خەولێرە د بەھرا شیخادی دا دەرکەفت.
ھەروەسا ئۆغلەما سێیێ دبێژنێ شلک کو ئەو ژی نانەکا تایبەتە، ئێزیدی ژ بەر رۆژا بوونا شێشمس چێدکەن و رۆژا پاشتر دبیتە جەژن و ھەرمالەکا ئێزیدی سەربرەکێ سەرژێدکەت.
