ل گۆرەی راپرسیەکێ بێکاری د ناڤا تەخا گەنجان دا گەھشتیە ئاستەکێ مەترسیدار و بەرپرسەکا گەنجان ژی دبێژیت: بریارە کۆنفرانسەکێ زانستی ل دۆر ئاریشەیێن گەنجان بھێتە سازکرن و تێدا دێ چارەسەری بۆ ئاریشەیێن وان ھێنە دیارکرن.
کەژان محەمەد، بەرپرسا پەیوەندیێن ئێکەتیا لاوێن دیمۆکراتا کوردستانێ بۆ خانی نیوز دیارکر، بریارە ناڤەراستا ھەیڤا بھێت دیدارا جڤاتا لاوێن کوردستانێ بھێتە سازکرن و تێدا دێ بریار ل دۆر سازکرنا کۆنفرانسەکێ زانستی ل دۆر ئاریشەیان گەنجان ھێتە دان، کو دێ کۆنفرانسەکێ زانستی بیت و چارەسەری دێ بۆ ئاریشەیێن گەنجان ھێنە دیارکرن.
کەژان محەمەد گۆت ژی: ئاریشەیێن گەنجێن کوردستانێ گەلەکن، بەلێ بێکاری ل پلا ئێکێ دھێت و ل گۆرەی راپرسیەکا ئێکەتیا لاوێن دیمۆکراتا کوردستانێ، رێژا بێکاریێ د ناڤا تەخا گەنجان دا مەترسیدارە، بریارە د کۆنگرەیەکێ رۆژنامەڤانی دا ئەنجامێن وێ راپرسیێ بھێنە ئاشکراکرن، بێگۆمان سەقامگیری و ھەبوونا کاری فاکتەرێن سەرەکینە گەنج ژ چەندین ئاریشە و تاوانان بھێنە دوورخستن و ھەتا گەنج خوەدی کاربن دێ ئاریشەیێن وان ژی کێمتر ببن.
ھەولێر، قائید میرۆ
