سه‌رۆكێ هه‌رێما كوردستانێ هه‌لویستێ هێزێن سیاسیێن سه‌ره‌كى یێن ئیراقێ ل سالا 2020ێ ل گه‌ل هه‌رێما كوردستانێ ب زۆر سته‌مكارانه ب ناڤ كر و راگه‌هاند، مانا شاندێ كوردستانێ بۆ زێده‌تر ژ دو حه‌فتیان ل به‌غدا نیازپاكى بوو، به‌لێ ب مخابنى ڤه هه‌تا نها به‌رسڤه‌كا ب كریارى ژ ئالیێ حكومه‌تا ئیراقا فیدرال نه‌بوویه.
نێچیرڤان بارزانی، سەرۆکێ هەرێما کوردستانێ، د په‌یامه‌كا پیرۆزباهیێ ب هه‌لكه‌فتا سالا نوو، پیرۆزباهیێ ل مالباتێن سه‌ربلندێن شه‌هیدان و گه‌لێ ئیراقێ و نوونه‌رێن وه‌لاتان ل كوردستانێ و ئیراقێ و ل جیهانێ كر، هیڤى ژى خواستن سالا نوو كوردستان و ئیراق و هه‌موو مرۆڤایه‌تى ژ نه‌خۆشێن سه‌ختێن سالا بوورى و ڤایرۆسێ كۆرۆنایێ ده‌رباز ببن و ساله‌كا پرى ئارامى و خۆشى و سه‌قامگیرى بیت، جاره‌كا دى ژى ژیان ئاسایى ببیته ڤه.
ل دۆر بڕینا مووچه و بودجا هه‌رێمێ ژ ئالیێ به‌غدا ڤه نیچیرڤان بارزانى گۆت: حكومه‌تا ئیراقێ دڤێت شایسته‌یێن دارایى یێن سالا 2020ێ یێن هه‌رێما كوردستانێ و ل دووڤ رێكه‌فتنا به‌رى نها قه‌ربوو بكه‌ت، هه‌روه‌سا پێدڤی بوو سه‌رۆكوه‌زیرێن ئیراقێ و حكومه‌تا فیدرال و هه‌مى ده‌زگه‌هێن فه‌رمى یێن ده‌وله‌تا ئیراقێ، ئه‌و نه‌دادپه‌روه‌رییا همبه‌رى فه‌رمانبه‌ر و مووچه‌خوران و خه‌لكێ هه‌رێما كوردستانێ قه‌بوول بكه‌ن.
سەرۆکێ هەرێما کوردستانێ،ل دۆر ره‌وشا ناڤخوه‌یا هه‌رێما كوردستانێ ژى گۆت: ب مخابنی ڤه ناكوكیێن سیاسى یێن د ناڤبه‌را ئالیێن سیاسی دا به‌رده‌وامه، ره‌وشا ژیان و ده‌روونێ خه‌لكێ كوردستانێ ب شه‌ره‌كێ ئاست نزمێ سوشیال میدیایێ خرابتر لێكرییه و زۆركرنا ئه‌وێ جوداهیا سیاسى، دێ بیته ئه‌گه‌رێ هندێ كو هێزێن سیاسیێن هه‌رێما كوردستانێ زۆر لاواز بكه‌ت.
