بڕیارە سوباهى رۆژا چوارشەمبی جارەکا دی پەرلەمانێ عیراقێ بۆ دیارکرنا سەرۆککۆماری کۆمببیت و شارەزایەکێ قانوونی ژی ئاماژەکر، ئەگەر کۆمبوونێ سەرنەگرت و دەمێ قانوونی دوماھی ھات ئەگەرێن ھەلوەشاندنا ڤێ خۆلا پەرلەمانی ھەیە ئەوژی گورەی دستووری.
ھەلوێست میرانی، شارەزایێ قانوونی بۆ ئاژانسا خانی دیارکر” ئەگەر بھێت و د کۆمبوونا سوباهى رۆژا چوارشەمبی بۆ دیارکرنا سەرۆککۆماری رێژا قانوونی یا پەرلەمانتاران پشکداریێ نەکەن، ئەڤە تنێ چار رۆژ دێ مینن بۆ ئێکلاکرنا پرسا سەرۆککۆمارێ عێراقێ،ئەڤەژی گورەی ئەڤی دەمێ دستووری دیارکری، کو 30 رۆژ ھاتینە دیارکرن بۆ ھەلبژارتنا سەرۆککۆماری، ئەگەر بھێت و ددەمێ دیارکری سەرۆککۆمار نەھاتە ھەلبژارتن ئەڤە سیناریۆیا ھەلوەشاندنا پەرلەمانێ عێراقێ دێ ھێتە پێشنیارکرن.
ئەڤی شارەزایێ قانوونی گۆت: گورەی بڕگا ئێکێ یا مادێ 64 یا دستووری دو رێک ھەنە بۆ ھەلوەشاندنا پەرلەمانی ئەوژی لسەر داخوازا دو لسەرسێ یا ئەندامێن پەرلەمانی، واتە پێدڤی ب ئیمزایا 220 ئەندامێن پەرلەمانی ھەیە لسەرجەمێ 329 ئەندامان، وی دەمی دێ کەڤیتە دەنگدانێ و ئەگەر بھێت و دەنگێ زۆرینە بدەستڤەئینا ئەڤە دێ پەرلەمانێ نوکە ھێتە ھەلوەشاندن.
ھەلوێست میرانی ئاشکراکر، رێکا دووێ بۆ ھەلوەشاندنا پەرلەمانی لسەر پێشنیارا سەرۆکوەزیران و ب رازیبوونا سەرۆککۆماری، پەرلەمان دێ ھێتە ھەلوەشاندن، بەلێ سەرۆکوەزیر و سەرۆکكۆمارێن نوکە کار فرێکەرن و دەستھەلاتا ھەلوەشاندنا پەرلەمانی نینە، ئەڤەژی ڤێ چەندێ خویا دکەت تنێ پەرلەمان دشێت خوە ب ھەلوەشینیت.
