رێکخستنا ساخلەمییا جیھانی ئێکەم ڤاکسینێ کۆرۆنایێ یێ کۆمپانیێن فایزەر و بایۆنتیک بۆ بکارئینانێ پەسەندکر.
رێکخستنا ساخلەمییا جیھانی د بەیانەکێ دا راگەھاند، ڤاکسینێ فایزەر و بایۆنتیک یێن کۆرۆنایێ ھاتە پەسەندکرن، رێکخستنێن جیھانی ژی وەکی یونسێف و یێن دی دشێن ڤاکسینی ب دەستخۆەڤە بینن دا کو ب سەر وەلاتێن جیھانێ دا بەلاڤ بکەن.
ل گۆرەی ئامارێن لژنا چاڤدێریکرنا ڤایرۆسێ کۆرۆنایێ وولد میتەر، تا نھا ھەشتێ و سێ ملیۆن و شەشسەد و چل و پێنج ھزار و پێنجی و سێ کەس تووشی ڤایرۆسێ کۆرۆنایێ بووینە، ژ وێ ھەژمارێ ژی، ملیۆنەک و ھەشتسەد و بیست و دوھزار و سەد و چل و نەھـ کەسان ژیانا خوە ژ دەست دایە.
دکتۆر ماریانگێلا سامیاو، ھاریکارا رێڤەبەرێ گشتی یێ ساخلەمیا جیھانی ئاماژە ب وێ یەکێ دا، ئەو گاڤا رێکخستنا ساخلەمییێ گاڤەکا گەلەک ئەرێنی یە بۆ پشتراستبوون ژ بەردەستبوونا ڤاکسینێ کۆرۆنایێ، لێ پێنگاڤێن جیھانی یێن مەزنتر پێدڤی نە ژ پێخەمەت گەھشتنا ڤاکسینێ کۆرۆنایێ ب خەلکێ ھەموو وەلاتان.
رێکخستنا ساخلەمییا جیھانێ ئاشکرا ژی کر، پەسەندکرنا ڤاکسینی بۆ بکارئینانێ پشتی وێ یەکێ ھات کو تیمێن وان و شارەزایێن وی واری پێداچوون ب سلامەتی و کوالتییا ڤاکسینی کرییە، نھا ژی خواندنێن زێدەتر بۆ داتایێن ڤاکسینی دھێنەکرن و ل پێنجی ڤێ ھەیڤێ ژی چەوانییا ب کارئینانا وی دێ ھێتە بەلاڤکرن.
ل ھەشتی کانوونا ئێکێ یا سالا دوھزار و بیستێ، بریتانیا وەک ئێکەم وەلات ڤاکسینێ کومپانییا فایزەر و بایۆنتیک پەسەندکر، د دووڤ دا ئەمریکا و کەنەدا و وەلاتێن ئێکەتییا ئەورۆپا ژی دەست ب بەلاڤکرنا وی کر.
