ب چاڤدێریا پارێزگارێ دهۆكێ چهند پرۆژێن خزمهتگوزارى ل سنورێ دهڤهردارییا شێخان هاتنه ڤهكرن
بۆ دوڤچوونا پرۆژێن خزمهتگوزارى ئهوێن ل دهڤهردارییا شێخان دهێنه ئهنجامدان ئهڤرۆ نیڤرۆ رۆژا چارشهمبى 27/ 4/2022 ب چاڤدێرییا د.عهلى تهتهر پارێزگارێ دهۆكێ و ب ئامادهبوونا عهبدولخالق بابیرى بهرپرسێ لقێ 20 یێ پارتى و سهردار یهحیا بهرزنجى دهڤهردارێ شێخان و چهند پهرلهمانتارێن دهڤهرێ ئهڤ پرۆژێن ل خارێ هاتنه ڤهكرن:-
1- ڤهكرنا پرۆژێ بهرههمئینانا ئالیكا كهسك بۆ ئاژهلان ل گوندێ كانى فهلا ل سنورێ ناوچهدارییا قهسروكێ، پرۆژه دهێته هژمارتن ئێكهمین پرۆژێ بهرههمئینانا ئالیكا كهسكه ل سهر ئاستێ ههرێما كوردستانێ، پرۆژه ژلایێ كۆمپانیا (گولف كیستون) یا بهرههمئینانا پهترۆلێ هاتییه دورستكرن وبهرههمێ پرۆژهى د ماوێ حهفت رۆژاندا دگههیته قوناغا ب كارئینانێ و گهلهك مفایێن خوه ههنه بۆ ب خودانكرنا ئاژهلى.
2- ڤهكرنا پرۆژێ تهمامكرنا جادا دوو سایدى یا 30 مترى ل سهنتهرێ ناوچهدارییا كهلهكچى ب كوژمێ (574) ملیۆن دیناران.
3- ڤهكرنا رێكا كهلهچى بۆ گوندێ دوریشان ب درێژاهییا 6كم ب كوژمێ (374) ملیۆن دیناران.
4- ڤهكرنا رێكا گوندێ تل گومل ب درێژاهییا 4كم ب كوژمێ (286) ملیۆن دینارا .
5- ڤهكرنا پرۆژێ رێكا گوندێ شیفكێ ب درێژاهیا 7كم ب كوژمێ (195) ملیۆن دیناران.
ههر چار پرۆژێن ناڤبرى ل سهر بودجا حكومهتا ههرێما كوردستانێ هاتینه چێكرن و هژمارهكا زۆر یا خهلكێ دهڤهرێ دێ مفاى ژێ بینن.
ل دور ڤان پرۆژان پارێزگارێ دهۆكێ گۆت: پار ساڵ مه بهرێ بنیاتى بۆ چهندین پرۆژان ل ڤێ دهڤهرێ دانابوو هندهك ب دووماهى هاتینه و هندهك ل ژێر قوناغێن بجهئینانێ نه، ئهو رێكێن مه ڤهكرین خهلكهكێ زۆر دێ مفاى ژێ بینن.
ههروهسا تهكهزكر كو ل دهمهكێ نێزیك قوناغا دووێ یا ئهنجامدانا پرۆژێن خزمهتگوزارى وهكو ئاڤ و رێك و پرۆژێن تهندورستى و پهروهردێ دێ هێته راگههاندن كو چارسهرییا ئاریشێن خهلكێ دهڤهرێ بكهن.
گۆت ژی: ژ نوكه وێڤه دێ پتر گرنگییێ دهینه كهرتێ چاندنێ و خهلكێ گوندا دا خهلكێ مه پتر قهستا گوندا بكهت و كاروبارێن چاندنێ و ئاژهلدارییێ ئهنجامدهت.
