لقا 17 یا پارتى ل شنگالێ: دڤێت قه‌چاخچى ل شنگالێ نه‌مینن

ده‌رباره‌ى ره‌وشا شنگال و ئه‌و نه‌هامه‌تییێن ب سه‌رخه‌لكێ خوشتڤى یێ شنگالێدا هاتى، ژلایێ هنده‌ك لایه‌نێن سیاسى ییێن نه‌به‌رپرس موزایه‌ده‌ بدژى پارتى دووباره‌ بوو، لڤێرێ دێ بیرا هه‌موو لایه‌نان ئینین كو خه‌لكێ شنگالێ بخوه‌ شاهدێ هندێ یه‌ كا كێ قوربانى دایه‌ و خوین رێشتییه‌، لده‌مێ هێرشا تیرورستێن داعشێ بۆ سه‌ر شنگالێ هه‌موو ئه‌و هێز و لایه‌نێن موزایدێ دكه‌ن ب ئێكه‌تى و په‌كه‌كه‌ و حكۆمه‌تا عیراقێ ڤه‌ ل شنگالێ بوون، كه‌سێ به‌ره‌ڤانى ژ شنگالێ نه‌كر و بتنێ پارتى به‌ره‌ڤانى كر و خوین دا، د پرۆسه‌یا ئازادكرنا چیایێ شنگال و رێكێن شنگالێ دا ل مه‌ها كانوونا ئێكێ یا سالا 2014، و ل ئوپه‌راسیۆنا ئازاكرنا شنگالێ ل چریا دووێ یا سالا 2015 ئه‌و پارتى و پێشمه‌رگێن پارتى بوون كو بتنێ و ب خوینا خوه‌ شنگال ئازاد كرى و تولا وان ژ تیرورستێن داعشێ ڤه‌كرى.

پشتى پلانا 16 ئوكتۆبه‌را 2017 ژى پێشمه‌رگه‌یێن پارتى لسه‌ر داخازا خه‌لكێ شنگالێ داكو شه‌ر نه‌كه‌ڤیته‌ شنگالێ و دناڤبه‌را شنگالییان دا ئالوزى دروست نه‌بن، ژ شنگالێ ده‌ركه‌ڤتن ب وى مه‌رجى كو خه‌لكێ شنگالێ ب خوه‌ كاروبارێن خوه‌ برێڤه‌ببه‌ن وئارمانجا پارتى ژى ئه‌و بوو ده‌رفه‌تێ بده‌نه‌ خه‌لكێ شنگالێ كو ئه‌و بخو حوكمى ل خوه‌ بكه‌ن، به‌لێ حكۆمه‌تا عیراقێ بوو سوزێن خو بن پێكرین و شنگال دایه‌ ده‌ستێ قه‌ده‌ر و حۆكمێ چه‌كدارێن په‌كه‌كێ و میلیشیێن نه‌ یاسایى كو كارێ وان بتنێ قاچاخچى و موخه‌ده‌رات و رێگریكرن ل ڤه‌گه‌راندنا ئاواره‌یان و یاریكرن ب چاره‌نڤیسێ شنگالێ بوو، هه‌موو لایه‌ك وێ راستییێ باش دزانن كو ژبه‌ر داخازا خه‌لكێ شنگالێ پارتى خوه‌ ژ شنگالێ ڤه‌كێشا ئه‌گه‌ر نه‌ دا چه‌وا پارتى ل پردێ و سحێلا دفنا چه‌كدار و میلیشییان شكێنیت، هه‌روه‌سا دفنا ده‌ست درێژكاران و چه‌كدارێن قاچاغچى ل شنگالێ شكێنیت.

لده‌ڤ پارتى چاره‌نڤیسێ خه‌لكێ شنگالێ و ڤه‌گه‌راندنا ئاواره‌یان و جێگیربوونا ژیان و سه‌قامگیرییێ بۆ خه‌لكێ مه‌زلومێ شنگالێ ئه‌وله‌وییه‌تا سه‌ره‌كییه‌، و ئه‌و هه‌ر ئه‌و سیاسه‌تا درووسته‌ كو به‌رژه‌وه‌ندیا شنگالییان دڤێت، و خه‌لكێ خوشتڤى یێ شنگالێ گه‌له‌ك باش دوێ سیاسه‌تا پارتى دگه‌هن و پشته‌ڤانییێ لێ دكه‌ن، و به‌لگه‌ لسه‌ر وێ چه‌ندێ هه‌لبژارتنێن ئوكتۆبه‌را بوورى یێن عیراقێ یه‌، كو خه‌لكێ شنگالێ بتنێ ده‌نگ ب پارتى دایه‌ و هه‌ر پارتى بوو كورسییێن شنگالى بده‌ستڤه‌برین.

پارتى دیمۆكراتى كوردستانى وه‌سا دبینیت كو دڤێت ره‌وشا شنگالێ ئاسایى ببیت و هێزێن نه‌یاسایى و قاچاغچى و میلیشى ژێ بده‌ركه‌ڤن و به‌لا خوه‌ ژ خه‌لكێ شنگالێ ڤه‌كه‌ن، دڤێت ب زووترین ده‌م رێك بۆ ڤه‌گه‌ریانا ئاواره‌یان بهێته‌ ڤه‌كرن و شنگال بۆ خه‌لكێ ره‌سه‌نێ شنگالێ بهێته‌ ڤه‌گه‌راندن، پارتى نه‌ڤێت ئێدى چاڤه‌رێى هندێ بیت خه‌لكێ شنگالێ لژێر هه‌ره‌شه‌ و گه‌فێن ئاواره‌بوونێ دا بژیت و یارى ب چاره‌نڤیسێ وێ بهێته‌كرن.

لقا 17 یا پارتى دیمۆكراتى كوردستان