جەمال کۆچەر: ئەگەرێن سیاسی ل پشت بڕیارێن دژی نەفتا ھەرێما کوردستانێ ھەنە

ئاژانسا خانی ، تایبەت:

پەرلەمانتارەکێ کورد ل پەرلەمانێ عێراقێ بەغدا تۆمەتبار دکەت لدۆر دەرنەکرنا قانوونا نەفت و غازێ و ئاشکرا کر: ئەو بڕیارێن دژی نەفتا ھەرێما کوردستانێ دھێنە دەرکرن ھندەک ژ وان سیاسینە بۆ پەیداکرنا گڤاشتنا ل سەر ھەرێمێ.

جەمال کۆچەر، پەرلەمانتارێ عێراقێ بۆ ئاژانسا خانی دیار کر: دو ئەگەر ھەنە بۆ دەرکرنا بڕیارێن دژی کەرتێ نەفتا ھەرێما کوردستانێ یا ئێکێ ئەجێندایێن سیاسی ل پشت دەرکرنا ئەڤان بڕیاران ھەنە، ئەگەرێ دویێ بۆ ڤێ چەندێ ڤەدگەڕیت حوکمەتا عێراقێ دخوازیت بڕیارا دادگەھا فیدڕالی ل دژی بادەکا نەفتا ھەرێما کوردستانێ ھەر دەمەکێ بخوازیت ب کاربینیت بۆ چێکرنا گڤاشتنان ل سەر ھەرێمێ، واتە کەنگی بەغدا بڤێت ئەڤێ بڕیارا دادگەھا فیدڕال بکاربینیت.

ناڤهاتی گۆت ژی” باشترین چارەسەری بۆ بەرھنگاربوونا بڕیارا دادگەھا فیدڕالی دەرکرنا قانوونا نەفت و غازا عێراقێ یە، چونکی هەکە قانوون دەرکەڤیت لدۆر نەفت و غازێ ئەڤە دێ مافێن ھەرێما کوردستانێ ھێنە دیارکرن.

جەمال کۆچەر ئاشکرا کر ژی” کەرتێ نەفتا عێراقێ د دەستێ عێراقێ دا نینە، چونکی ل سالێن ١٩٦٠ ێ وەرە دەولەتا عێراقێ نەفتێ بەرھەم دئینیت و وەزارەتا نەفتێ ھەیە، بەلێ ھێشتا قانوونەکا تایبەت ب نەفتێ نینە ئەڤە ل دونیایێ نەبوویە مە کوردان ژی نەڤیایە بەری نوکە قانوون دەرکەڤیت، بەلێ تۆمەتبارا سەرەکی بەغدایە.