جۆ بایدن، سه‌رۆكێ ئه‌مریكا بۆ چاره‌سه‌ركرنا قه‌یرانا كێمییا شیرێ زارۆكان ل وى وه‌لاتى ده‌ست ب گرتنه‌به‌ر یا رێكارێن بله‌ز كر.
ده‌مێ چه‌ند رۆژایه قه‌یرانا كێمییا شیرێ زارۆكان ل وه‌لاتێ ئه‌مریكا سه‌رهلدایه و كۆچكا سپى ده‌ست ب گرتنه‌به‌ر یا رێكارێن بله‌ز بۆ رووبرووبوونا وێ قه‌یرانێ كر، ب پشت به‌ستن ب یاسایا به‌رهه‌مئینانا كه‌ره‌ستێن به‌رگریێ بۆ زێده‌كرنا به‌رهه‌مئینانا Fly Formula و راسپاردنا فرۆكێن پنتاگۆنێ بۆ ئینانا بله‌ز یا شیرێ ده‌ستكرد ژده‌رڤه‌ى ئه‌مریكا.
ئه‌ڤ لڤینه ژى ئێكه‌م ده‌ستپێشخه‌رییا سه‌رۆكاتییه ژ بایدنى بۆ به‌رسڤدانا قه‌یرانا كێمبوونا شیرى كۆ بوویه ئه‌گه‌رێ ترسه‌كا مه‌زن ل ده‌ڤ ده‌یك و بابان ل وى وه‌لاتى و بوویه ئه‌گه‌ر كۆ دیموكرات و كومارى پێكڤه بهێنه سه‌ر خه‌ت بۆ رووبرووبوونا وێ قه‌یرانێ و گرتنه‌به‌ر یا رێكارێن پێدڤى.
رۆژناما نیویورك تایمز ژى به‌لاڤكریه، ئه‌ڤ بریاره دده‌مه‌كى دایه كۆ كێمبوونا شیرى وه‌خته ببیته كاره‌ساته‌كا سیاسى یا مه‌زن ل ئه‌مریكا.
ل گوره‌ى وێ پلانا كۆچكا سپى، سازییێن حكومى دشێن داخوازا بكارئینانا فرۆكێن بازرگانى یێن پنتاگۆنێ بكه‌ن بۆ ئینانا شیرێ زارۆكان ژده‌رڤه‌ى وى وه‌لاتى.
جۆ بایدنى ژى د توویته‌كى دا راگه‌هاند، ئه‌ز وه‌ك باب و باپیر، دزانم نوكه ده‌یك و باب ل سه‌رانسه‌رى وه‌لاتى د ترسه‌كا مه‌زن دانه بۆ ب ده‌ستڤه‌ئینانا شیرى بۆ زارۆكێن خۆه.
دیار ژى كر، وى بریار دایه لایه‌نێن په‌یوه‌ندیدار یا دشیانێن وان دا بیت بكه‌ن بۆ بده‌ستڤه‌ئینانا شیرێ زارۆكان یێ ساخله‌م و ب زیترین ده‌م بگه‌هیننه ده‌ستێ وان خێزانێن زۆرترین پێدڤى پێ هه‌ى.
