بەری نیڤرۆیا ئەڤرۆ ل سنورێ قەزا چەمچەمال فڕۆکەیێن تورکیا بارەگایەك و ترۆمبێلەکا چەکدارێن پەکەکێ کریە ئارمانج و بەرپرسەکێ دەڤەرێ ژی دبێژیت، چوار کەس ھاتینە کۆشتن و کەسەك ژی برینداربوویە.
ھێمن بەھجەت، رێڤەبەرێ ناحیا ئاغجەلەر ل قەزا چەمچەمال بۆ ئاژانسا خانی راگههاند، بەری نیڤرۆیا ئەڤرۆ فڕۆکەیێن تورکیا گۆندێ توو تەقەل یێ سەر ب قەزا چەمچەمال بوردۆمانکریە و بارەگایەکێ چەکدارێن پەکەکێ و ترۆمبێلەکا پەکەکێ بووینە ئارمانجا بودۆمانا فڕۆکەیێن تورکیا و لدووڤ زانیاریێن ھەتا نوکە ھاتینە وەرگرتن چوار کەس ھاتینە کۆشتن و کەسەک ژی برینداربوویە، بەلێ دناڤا کۆشتیاندا دو وەلاتیێن سڤیل ھەنە كو دگەل چەکدارێن پەکەکێ بووینە د دەمێ بوردۆمانێ.
ھێمن بەھجەت دیاركر: بوردۆمان ب رێیا فڕۆکەیێن بێ فڕۆکەڤان ھاتیەکرن و تەرمێ قوربانیێن بوردۆمانێ ژی دێ ھێنە ھنارتن بۆ نۆشداریا داد ھەتا ڤەکۆلین لسەر بھێتەکرن، ھێزێن ئەمنی و دەزگەھێن ھەوارھاتنێ گەھشتیە جهێ روویدانێ بۆ ھەوارچوونا وەلاتیێن سڤیل، چونکە بارەگایێن پەکەکێ ل دەڤەرێ ھەنە و ترس بۆ وەلاتیان پەیداکریە.
