عەلی حەفزوللا
هاوکێشەکە هزر و بیر ئالۆزکرن، سەر و مێشک ل خەلکی برن.. ئەرێ ما بوویە چ تا ئەڤ لەشکەرێ وەزیر و پەلەمانتار و شیرەتکار و دکتۆر و ئابورناسان و….هتد، هەمی نەشێن شیکارکەن و چارەکێ ببەنێ؟.. ئاخر نە گریمانا (ریمان)ە و نە بیردوزا (یوانگ میلز)ە ونە هاوکێشەیێن (نافيير ستوكس)ن و….هتد، ژ مەسەلێت زانستی یێن ماینە هەلاویستی و بێ چارە، یان کوردستانێ مەسەلەکا ئالۆزتر ل وێ گروپێ زێدەکریە؟!!.
وەک دیار ئەڤرو پەرلەمان ل گەل هند وەزیران روینشتنەکێ ل دور گرانییێ و رەوشا خەلکی سازکەت!.. ب کورتی ئەڤێ هاوکێشێ شیکارەکەن و پێدڤی چ کۆمبوونان ناکەت:
ئەگەر:
س = ئەرزانبوونا پەنزین و گازا سپی و.. هتد.
ص = قەیران و پاشەکەفت و برینا موچەی یان ٤٥ رۆژ جارەک.
ل = گرانبوونا گازا خام ل جیهانێ.
ق = پانزین و گازا سپی و.. هتد گرانبن و بفیریێن.
خ = خۆشحالی و ئەرزانی و بەرفەرهی بۆ وەلاتیان.
و ل گورەی واقعی کوردستانێ:
س = ص
ل = ق
و ل دویف لوژیک و پیڤەرێن جیهانی:
س = خ
داخازی / شیکار و دیار و دووپات کرن:
ل = خ
ب راستی ئێدی ل بەر خەلکی بەرزەبوو چ بکەن و چ بێژن.. دوعا بکەن گازا خام ل جیهانێ گران بیت دا موچە دروست بهێنەدان، پانزین و گازا سپی دێ فیریێن و موچە بەس تێرا وان ناکەت و قەیران دێ بێتە قەیرانێ جهێ من بکە!.. هەوارا راهێلن و ئومێدەوار و هیڤی خوازبن پانزین و گازا سپی ئەرزان بیت ئەو ب رامانا دوعاکرنا هاتنەخارا بهایێ گازا خامە ل جیهانێ ئەڤجا موچە هاتنە برین و بونە ٤٥ روژی!
مانە هەرسێ وەزارەتێن دارایی، سامانێن سروشتی و پلاندانانێ پەیوەندیدارن ب ڤێ چەندێ؟ مانە دڤێت هین خودان پلانێن نوکەیی (اَنیة) و دووم کورت و ناڤنجی و درێژخایەن بن!.. وپەرلەمان پەسەند بکەت؟!!
مانە پێدڤییە هەڤسەنگیەکێ بێخنە د ناڤبەرا بازاری و موچە و داهاتێ خەلکەکیدا؟.. ب ئێک ژ سێ رێیان: وەک هاوکێشە دەمێ بازار گران دبیت موچەی ب هەمان رێژە زێدەکەن، یان حکومەت ژبۆ کۆنترۆلا بهایان ب دانانا بازارێن گشتی یێن ب پشتەڤانی (مدعوم) هەڤرکییا بازارێ تایبەت بکەت، یان ب زەربێ هێزێ بهایێن گونجای دگەل مووچەی دەستنیشان بکەت و بسەپینیت… (ئەز بێژم خەلکەک وەدکەت ..و.. ئەگەر نەزانی چاڤدە جیرانی)!!
ئەرێ خەلک پارەی ژ کیڤە بینیت؟ ما هەر ب تنێ گاز، پانزین، غاز، کارەب و ئاڤە؟!.. کو ئەو پارە هەمی هەر د بازنەکێدا بزڤریت ژ حکومەتێ بۆ وەلاتی بۆ حکومەتێ و…. هەر هوسا؟!.. مانە پێدڤییە ئەڤ خەلکە بخۆت، ڤەخۆت، جلوبەرگا بکەتێ، قستێن خانی و شوقا یان کرێیا خانی بدەت و ئێش و نەخۆشیان چارەسەرکەت ل وان نەخۆشخانێن ئەهلی یێن هندە ئەرزان و ب دلوڤانی و وژدان!.. و… هتد… ئەو موچە بۆ چ بیت و چ نە؟… خەلک داخازا ژیانا شاهانە ناکەت… تنێ تێرا بکەت، موعیز و پێدڤی فرۆتنا زێر و ئەرد و دەینکرنێ نەبن.. ما گونەهـ!؟.. گەریان و گەشت بۆ ژدەرڤە نەڤێن، خەونا ژ هەمیا مەزنتر ئەوە بشێت شەهیانا عەزیزەکێ خۆ بکەت یان فرێکەتە کۆلیژەکا ئەهلی و نابێژین یێن ئەمریکی و ترکی هەما بلا جیهان یان نەڤرۆز بیت.. ئەرێ ما ئەڤە ژی تاوانە!؟!… هەر ئێکی ب تنێ ژیەک هەیە لێ دا جارەکێ خوشگوزەرانیێ ببینیت هەوە دڤێت چەند جاران بهێتـە دنیایێ؟!..
ژ کەرەما خۆ.. ڤێ کو نزا چ ناڤ لێ بکەین سەلمینراوە یان بیردۆزە یان هاوکێشەیە.. شیکار “حەل” کەن.. بەلکی تشتەکی فەهم بکەین…. ئەرێ راست (ل=خ) ئەگەر بەلێ بیت چەوا و کەنگی؟.. و ئەگەر نەخێر بیت بوچی؟..
