جوان رۆژبه‌یانی: ھێشتا مەترسی ل سەر سۆتنا گەنمێ کوردان هەیە

ئاژانسا خانی ، تایبەت:

چەند رۆژەکە پشتی گەھشتنا بەرھەمێ جۆتیارێن کورد ل دەڤەرێن کوردستانی گەف ل جۆتیارێن کورد دھێنە کرن و سەرۆکا لژنا دەڤەرێن کوردستانی ژی دبێژیت، ئەرکێ حوکمەتا بەغدایە پارێزگاریێ ل جۆتیاران و بەرھەمێ وان بکەت.

جوان یونس رۆژبەیانی، زێدەتر بۆ ئاژانسا خانی دیار کر” ھێشتا مەترسیێن مەزن ل سەر جۆتیارێن کورد ل دەڤەرێن کوردستانی ماینە و نەشێن وەک پێدڤی بەرھەمێن خۆ ب دروین و بدەستڤە بینن، چونکی چەکدارێن داعشێ و ھندەک عەرەبێن شۆفێنی بناڤێ داعشێ گەفان ل جۆتیارێن کورد دکەن، مەترسی ل سەر جۆتیارێن کریستیان و نەتەوێن دی ژی ھەیە ب تنێ ھەر کورد نینن.

ناڤهاتییێ گۆت ژی” بەری نوکە مە داخواز ل حوکمەتا عێراقێ کرییە ئەرکێ خۆ بۆ پاراستنا جۆتیارێن کورد بجھ بینیت و بەرھەمێ وان د وەرزێ ھاڤینێ بھێتە پاراستن، بەلێ بەغدا یا پێگیر نینە، ھەروەسا مە داخواز کرییە قەرەبوویا جۆتیارێن کورد بھێتە کرن، دیسا چەند سالە گەنمێ جۆتیارێن کورد دھێتە سۆتن و ناھێنە قەرەبوو کرن.