وه‌زاره‌تا سامانێن سرۆشتى: به‌رهه‌مئینانا گازا سرۆشتى ل كێلگه‌ها كۆرمۆر یا به‌رده‌وامه‌

بریكارێ وه‌زاره‌تا سامانێن سرۆشتى راگه‌هاند به‌رهه‌مئینانا گازا سرۆشتى ل كێلگه‌ها كۆرمۆر یا به‌رده‌وامه‌ و هه‌نارده‌كرنا گازێ بۆ وێستگه‌هێن به‌رهه‌مئینانا كاره‌بێ یا ئاساییه‌.

وه‌زاره‌تا سامانێن سرۆشتى دراگه‌هاندنه‌كێ دا دیاركر، ب فه‌رمانا وه‌زیرێ سامانێن سرۆشتى، شانده‌كێ وه‌زاره‌تێ ب سه‌رپه‌رشتییا بریكارێ وه‌زاره‌تێ ئه‌حمه‌د موفتى سه‌ره‌دانا كێلگه‌ها كۆرمۆر كر و دگه‌ل به‌رپرسێن كۆمپانییا دانه‌گاز كۆمبوو و ڤه‌كۆلین ل سه‌ر زیانێن هێرشا مووشه‌كى ل سه‌ر كێلگه‌هێ كر، و بریارا دامه‌زراندنا ژۆره‌كا ئوپه‌راسیونان ب سه‌رپه‌رشتییا وه‌زاره‌ت و ئه‌ندامێن لایه‌نێن په‌یوه‌ندیدار هاته‌ دان.

هه‌روه‌سا دراگه‌هاندنا وه‌زاره‌تێ دا هاتییه‌، بریكارێ وه‌زاره‌تا سامانێن سرۆشتى وه‌لاتییێن هه‌رێما كوردستانێ پشت راست كرینه‌ كو وێ هێرشێ زیانێن گیانى نه‌بووینه‌ و به‌رهه‌مئینانا گازا سرۆشتى ل كێلگه‌هێ یا به‌رده‌وامه‌ و كۆنترۆلا زیانێن مادى هاتییه‌ كرن، هه‌روه‌سا هه‌نارده‌كرنا گازێ ژى بۆ وێستگه‌هێن به‌رهه‌مئینانا كاره‌بێ یا ئاساییه‌.