جڤاتا وەزیران چەند بڕیار بۆ ئینانا گیانەوەران دەركرن

حكومەتا هەرێما كوردستانێ دەربارەی ئینانا گیانەوەران چەند بڕیاردان و تێدا مەرجێن پشكنینا ڤیتێرنەری و بەرچاڤ وەرگرتنا پێدڤیێن بازاری تێدا هەنە.

فەرمانگەها میدیا و زانیاری ئەڤرۆ راگەهاند: پشتی كۆمبوونا جڤاتا وەزیران یا رۆژا 22-6-2022، چەند بڕیار و میكانیزمێن ئینانا گیانەوەران دەركربوون. ژوان ژی:

ئێك: پێگیرییا كاركرنێ ب مەرجێ دەستیرییا ئینانا گیانەوەران هەتا 17 چرییا ئێكێ یا 2022. ب بەرچاڤ وەرگرتنا ئەڤان خالان:

– بجهئینانا هەموو مەرج و رێنمایێن وەزارەتا چاندنێ و ژێدەرێن ئاڤێ د ئینانا گیانەوەران دا، تایبەت ب رێكێن ڤێتەرنەریێ و مەرجێن پشكنینێ ل دەروازەیێن سنووری بهێنە كەرنتینكرن.

– وەزارەتا چاندن و ژێدەرێن ئاڤێ دێ میكانزم و پلانا ئینانێ رێك ئێخیت، ب بەرچاڤ وەرگرتنا بەرهەمێ ناڤخۆیی خودانێن گیانەوەران و پێدڤیا بازاڕی و پارستنا سامانێن گیانەوەران ژ بەلاڤبوونا نەخۆشیان و رێگریكرن ژ كارتێكرنێن نەرینی لسەر سامانێ گیانەوەرێن ناڤخۆیی.

– بەرچاڤ وەرگرتنا ڕەوشا كێمبوونا وەرگران و كێمبوونا ئالیكی و ماددێن عەلەفی، بهایێ وان نەبیتە بارگرانی بۆ خودانێن گیانەوەرێن ناڤخۆ.

دوو: وەزارەتا چاندن و ژێدەرێن ئاڤێ پێداچوونەكا پێدڤی بكەت بۆ ئەنجامێن بجهئینانا ڤان بڕیاران ئانكو پشتی تمام بوونا دەمێ بجهئینانێ ل دووڤ قانونا ژمارە 145 یا تایبەت ب ئینانا گیانەوەران، وەزارتا ناڤهاتی هەلسەنگاندنێ بكەت و ڕاپورتان بۆ جڤاتا وەزیران بلند بكەت.