وه‌زاره‌تا په‌روه‌ردێ : هه‌ر رێڤه‌به‌ره‌ك پابه‌ندى رێنمایان نه‌بیت دێ هێته‌ دوورخستن

وه‌زیرێ په‌روه‌ردێ یێ حكومه‌تا هه‌رێما كوردستانێ فه‌رمانه‌ك ده‌رباره‌ى پیڤه‌رێن وه‌رگرتنا قۆتابیان ل وان قوتابخانه‌یێن گه‌له‌ك داخوازییێن وه‌رگرتنێ ل سه‌ر ده‌ركر و ئاشكراكر، هه‌ر قۆتابییه‌كێ ژ ده‌رڤه‌ى پیڤه‌ران بهێته‌ وه‌رگرتن، دێ رێڤه‌به‌رێ وێ قوتابخانه‌یێ ژ كار هێته‌ دوورخستن.

ل دووڤ فه‌رمانا وه‌زاره‌تا په‌روه‌ردێ یا حكومه‌تا هه‌رێما كوردستانێ، ئه‌و قوتابخانه‌یێن حكومى یێن گه‌له‌ك داخوازییا وه‌رگرتنا قۆتابیان ل سه‌ر و ب رێكا پشككێشانێ قوتابیان وه‌ردگرن، دڤێت ل دووڤ چه‌ند رێنمایان كارێ خوه‌ بكه‌ن، و ئه‌گه‌ر سكالایه‌ك ل دوور وه‌رگرتنا قۆتابیان ژ ده‌رڤه‌ى پیڤه‌ران گه‌هشته‌ وه‌زاره‌تێ، ئه‌و پشككێشانه‌ دێ هێته‌ هه‌لوه‌شاندن و رێڤه‌به‌رێ قوتابخانێ ژى دێ ژ پۆستێ خوه‌ هێته‌ دوورخستن.

هه‌روه‌سا د فه‌رمانا وه‌زاره‌تا په‌روه‌ردێ دا هاتییه‌، پێدڤییه‌ هه‌موو قوتابخانه‌ پێگیرییێ ب رێنمایان بكه‌ن و نابیت جوداهی بهێته‌كرن، ڤه‌گوهاستنا قۆتابیان ژ قوتابخانه‌یه‌كێ بۆ ئێكا دى دڤێت ل دووڤ رێنمایان بیت، و نابیت قۆتابى بۆ وان قوتابیخانه‌یان بهێنه‌ ڤه‌گوهاستن یێن كو گه‌له‌ك داخوازییا وه‌رگرتنێ ل سه‌ر و پێدڤییه‌ هه‌موو لایه‌ن پابه‌ندى وان فه‌رمانان بن یێن بۆ وان هاتینه‌ هنارتن.