كۆمپانیا دانه‌گاز راگه‌هاند، هێرشا مووشه‌كى یا دووهى كارێ به‌رهه‌مئینانا گازێ ل كێلگه‌ها كۆرمور نه راوه‌ستاندییه.
ئه‌ڤرۆ 26ى ته‌موزا 2022ێ كۆمپانیا دانه‌گاز یا كو وه‌به‌رهێنه‌رییێ ل كێلگه‌ها گازا كۆرمور دكه‌ت دیاركر، ل ئێڤارییا رۆژا دووشه‌مبى 25ى ته‌موزا 2022ێ ب دو مووشه‌كان هێرشى كێلگه‌هێ هاتییه كرن، لێ چ زیان نه‌بوون و كارێ به‌رهه‌مئینانێ ب شێوه‌یه‌كێ ئاسایى و بێى راوه‌ستییان دهێته‌كرن.
حكومه‌تا هه‌رێما كوردستانێ داخواز ژ حكومه‌تا عیراقێ كرییه ب رێكارێن پێدڤیى بۆ سنوورداركرن و رێگرتنێ ل دووباره‌بوونا ئه‌ڤان هێرشان راببیت و ئاشكراكر، ئارمانجا ئه‌وان ده‌ستدرێژییان كو چه‌ندین جاره دهێنه‌كرن، تێكدانا ئاسایش و سه‌قامگێرییا عیراقێ و پێشڤه‌برنا ئابوورێ هه‌رێما كوردستانێ یه.
كێلگه‌ها كۆرمور دكه‌ڤیته گوندێ كۆرمور یێ سنوورێ ده‌ڤه‌را قادر كه‌ره‌م یا سه‌ر ب قه‌زا چه‌مچه‌مال یا پارێزگه‌ها سلێمانییێ ڤه و هه‌ردوو كۆمپانییێن دانه‌گاز و نه‌فتا هیلال یا ئیماراتى وه‌به‌رهێنانێ تێدا دكه‌ن، و دووهى بۆ جارا چارێ دماوێ كێمتر دهه‌یڤه‌كێ دا تووشى هێرشان بوو.
