سپێدەهیا ئەڤرۆ چارشەمبی 2022/7/27 نێچيرڤان بارزانى، سه‌رۆكێ هه‌رێما كوردستانێ، پێشوازى ل مايك برايسۆن ڕيچاردسۆن باڵيۆزێ بریتانیا ل عیراقێ و شاندێ دگەل دا کر.
د کۆمبوونێ دا داوی پێشهاتێن رەوشا سیاسی یا عیراقێ و دەستنیشانکرنا بەربژارێ پۆستێ سەرۆک وەزیرێن داهاتی یێن حکومەتا فیدڕال یا عیراقێ و پەیوەندییێن هەولێر و بەغدا و ئاریشێن هەلاویستی دناڤبەرا هەردوو لا دا ب تایبەت د بوارێ نەفتێ دا و تۆپبارانکرنا ڤێ دوماهییێ یێن کێلگەها گازا کۆرمۆر و تۆپبارانکرنا هەفتییا دەربازبووی یا سەیرانگەهەکا گەشتیاری ل زاخۆ، گوتوبێژ کرن.
هه‌ردوولا هەڤرابوون لسه‌ر گرنگی و چاره‌سه‌ركرنا ئاریشێن هەولێر و بەغدا و پشتەڤانیکرنا حکومەتەکێ کو ببیتە ئەگەرێ بنەجهکرنا ئارامییا سیاسی و ئەمنی و بشێت خزمەتگوزاری و دەرفەتێن کاری پێشکێشی وەلاتییێن عیراقێ بکەت و بەرسڤدەرا خواستێن عیراقییان بیت.
سەرۆک نێچیرڤان بارزانی دوپاتی ل گرنگییا بەردەوامییا گوتوبێژان دناڤبەرا حکومەتا هەرێما کوردستانێ و حکومەتا فیدڕال یا عیراقێ دا کر بۆ چارەسەرکرنا ئاریشێن هەلاویستی یێن دناڤبەرا وان دا بتایبەت د بوارێ نەفت و گازێ دا، هەر وەسا ب پێدڤی زانی کو چارەسەرکرنا ئاریشێن هەولێر و بەغدا ل رێزبەندییا دەستپێکی یا کارێن حکومەتا داهاتی یا عیراقێ بیت.
هەلبژارتنێن داهاتی و گرنگییا ئێکرێزییا لایەنێن سیاسی یێن هەرێما کوردستانێ، رەوشا شنگالێ و پەیوەندییێن عیراق و هەرێما کوردستانێ دگەل وەلاتێن جیران، دوماهی پێشهاتێن ل سوریا و چەندین پرسێن دی جهێ گرنگیدانا هەڤپشک بوون دگەل ده‌يڤد هه‌نت كۆنسۆلێ گشتيىێ بريتانيا ل هه‌رێما كوردستانێ.
