دکونفرانسێ سێیێ یێ پێشڤەبرنا ناوچەدارسیا دێرەلۆکێ دا کو یێ تایبەت بو ب پەروەردێ و زانستی و ب ئامادەبوونا گولستان نهێلی ئەنداما لژنا پەروەدرێ ل پەرلەمانێ کوردستانێ و دکتور هەکار زەکی راگرێ پەیمانگەها تەکنیکی یا ئامێدیێ و هژمارەکا ماموستا رەوشەنبیرێن دڤەرێ ئێڤاریا ئەڤرۆ 28ى تیرمه‌ها 2022ێ ب رێڤەچوو، وەجیهـ مستەفا رێڤەبەرێ پەروەردا ئامێدییێ دیارکر، ل سنوورێ دەڤەرداریا ئامێدیێ 163 قوتابخانە هەنە کو ژ وانا 30 ئامادەیی نە و 7 باخچەنه.
و گۆت : مە 146 ئاڤاهی یێن هەین کو ژوانا 126 دهێنە بکار ئینان، و رێژا قۆتابیان ل دێرەلۆکێ 15٪ بوویە و رێژا ئاڤاهییان 16٪ بوویە.
زێده‌تر رێڤه‌به‌رێ په‌روه‌ردا ئامێدییێ ئاشكراكر، وان 2731 ماموستا و فەرمانبەر هەنە ل گەل 774 وانەبێژان، و ئاشکراکر، دڤان دو سالاندا چەندین پرۆژە دبوارێ پەروەردێ و نووژەنکرنا قوتابخانا دا هاتینە بجهـ ئینان و بۆ ئەڤ سالە ژی رازیبوون ل سەر نووژەنکرنا هند قوتابخانێن دیتر هاتییە کرن.
و گۆت: ئاریشا مەزن یا دەڤەرا مە رەوشا ئەمنی یادەڤەرێ یە و دڤان دو سالاندا دورێن 75 ماموستایان ل دەڤەرا مە هاتینە ڤەگوهاستن و دبەرمبەر دا ب تنێ ئێک ماموستا بو مە هاتییە.
هه‌روه‌سا وه‌جیهـ مسته‌فاى دیاركر، ژ بەر رەوشا ئەمنی و بەفرەهییا جگرافییا دەڤەرێ ئەو نەشێن ب دروستی رێنمایێن پەروەردێ ل هەموو دەڤەران بجهـ بینن.
ژلایێ خوە ڤە دکتور هەکار زەکی راگرێ پەیمانگەها تەکنیکی دیارکر، چ پێشکەفتن نابن ئه‌گه‌ر پلان نەهێتە دانان وگۆت : دڤێت دەزگەهێن ئەکادیمی بهێنە پێشخستن و حکومەت ل سەر وەبەرهێنەران فەرز بکەت پرۆژێن وەبەرهێنانێ ل دەڤەرێ ئەنجام بدەن بو وێ یەکی پێشکەفتنەک ل دەڤەرێ بهێتە دیتن.
ژلایه‌كێ دیڤه گولستان نهێلی دیارکر، سێکتەرێ پەروردێ گەلەک یێ گرنگه و ئه‌گه‌ر پەروردە پێشنەکەڤیت سێکتەرێن دیتر ژی پێشناکەڤن و گۆت : د پرۆژێ نوکە یێ پەرلەمانی د بوارێ پەروەردێ دا 197 مادە هەنە کو پتریا وان رێنمایی نە.
موحەمەد سەلیم فەیسەل بەرپرسێ لژنا ناوچا دێرەلۆک و ئەندامێ رێکخستنا کونفرانسی دیارکر، پێشختن دبوارێ پەروەردێ و زانستێ دا گەلەک کرنگ بوویە و ژ بەر وێ چه‌ندێ ژی ئەڤ کونفرانسێ تایبەت ل سەر هاتییە رێکخستن ژبه‌ركو یا ب نفشێ پاشەرۆژێ ڤە گرێدایە وگۆت : ئەم بخێرهاتن و دەستخوەشییێ ل بەشداربوویان دکەین کو شیاینە ڤی بابەتی ب ئازرینن و بگەهیننە ئەنجامەکی و راپۆرتەکی ل سەر ڤی کەرتی ئامادە بکەن و بگەهیننە لایەنێن پەیوەندیدار.
