لژنهیا بلند یا تاقیكرنان ل وهزارهتا پهروهردێ یا حكومهتا ههرێما كوردستانێ روونكرنهك ل دوور حالهتێن قوپیاكرنێ ل دهمێ تاقیكرنێن گشتى یێن پولا 12ێ ئامادهیى دا و دیاركر 111 حالهتێن بزاڤا قوپیكرنێ ل دهمێ تاقیكرنان هاتینه كونترۆلكرن، و ئهو كهسێن ب ڤێ چهندێ رابووین رێكارێن پێدڤى بهرامبهرى وان هاتینه وهرگرتن.
وهزارهتێ دهربارهى برنا ژوورا موبایلێ ئاشكراكر، هندهك كهمتهر خهمى هاتبوونه كرن، و ل ههر هولهكا وێنه بۆ پسیاران هاتبیته گرتن، رێڤهبهر و هاریكار و چاڤدێرێن وێ هولێ ههموو هاتینه سزادان ژبهركو كهمتهر خهمبووینه.
ژلایهكێ دیڤه و دبهرسڤا وێ دهنگویى دا كو كرین و فرۆتن ب ئامیرێن قوپیكرنێ هاتینهكرن وهزارهتێ دیاركر، بزاڤێن قۆپیاییێ ژ دهرڤهى قۆتابخانهیان هاتینه كرن، لێ وان نههێلایه بگههنه هولێن تاقیكرنان، و ئهو كهسێ ئهو دهنگویه بهلاڤكرى كو بناڤێ ( عومهر فهقى ) یه، وى ب خۆژى پاشان دیاركر كو ئاخڤتنا وى دچارچووڤێ وان 111 حالهتانه یێن وهزارهتا پهروهردێ كونترۆلكرین.
ههروهسا وهزارهتێ دهربارهى دهنگوویێ هنارتنا نامهیێن كورهكى و برنا ژوورا موبایلان راگههاند، پێشتر دحالێن پشكنینا قۆتابیاندا كهمتهر خهمى هاتبوونهكرن، لێ ب ههماههنگى دگهل هێزێن ئاسایشێ خودانێن وان ژمارێن موبایلان هاتینه دهستهسهركرن و تاقیكرنێن وان ب قۆپیكرنێ هاتینه هژمارتن.
