نه‌ته‌وه‌یێن ئێكگرتى داخوازێ ژ لایه‌نێن عیراقێ دكه‌ت، ب رێكا دیالۆگا نیشتیمانى ل سه‌ر چاره‌سه‌ركرنا كێشه‌یان رێك بكه‌ڤن و دبێژیت : عیراقییان پێدڤى ب به‌رده‌وامییا هه‌ڤركییا ده‌ستهه‌لاتێ و رووبرووبوونا ئێك و دو نینه، به‌لكو پێدڤیى ب چاكسازییا ئابوورى و پێشكێشكرنا خزمه‌تگوزارییانه.
ئه‌ڤرۆ چارشه‌مى سێیى ته‌باخا 2022ێ هنارتییا تایبه‌ت یا نه‌ته‌وه‌یێن ئێكگرتى بۆ هاریكارییا عیراقێ راگه‌هاندنه‌ك ل دوور ره‌وشا عیراقێ به‌لاڤكر و تێدا دیاركر، دیالۆگا دناڤبه‌را هه‌موو لایه‌نێن عیراقێ دا بۆ ڤى ده‌مى یا پێدڤییه، ژبه‌ركو روودانێن ڤێ دووماهییێ مه‌ترسییا ل سه‌ر زوو ژ ناڤچوونا سیاسه‌تێ و په‌یداكرنا ئالوزییان زێده دكه‌ت، ل ده‌مه‌كى هه‌موو لایه‌نان دووپاتى ل گرنگییا بنه‌ماییێن دیمۆكراسیێن وه‌ك پابه‌ندبوون ب ده‌ستوورى و رێزگرتنا دامه‌زراوه‌یێن ده‌وله‌تێ دكر، لێ ل ڤێ دووماهییێ ئه‌و چه‌نده به‌رچاڤ نه‌هاته وه‌رگرتن و كارتێكرنه‌كا نه‌رێنى ل سه‌ر باوه‌رییا وه‌لاتییان كر.
نه‌ته‌وه‌یێن ئێكگرتى ل دوور ره‌وشا عیراقێ باس ل هندێ كر، چ حزب و گرۆپ نه‌شێن وه‌سا هزر بكه‌ن كو قه‌یرانان كاریگه‌رى ل سه‌ر نابیت، له‌وما پێدڤییه چاره‌سه‌رى ب رێكا دیالۆگا گشتگیر بهێته كرن، ژبه‌ركو ب نه‌بوونا دیالۆگێ، عیراق دێ به‌رده‌وام ل ژێر كاریگه‌رییا زالبوونا هه‌ڤركییێن بێ راماندا بیت، و دێ بیته ئه‌گه‌رێ نه‌سه‌قامگێرییێ و وه‌لاتى دێ باجه‌یا وێ ده‌ن.
