وه‌زاره‌تا كاروبارێن شه‌هیدا و ئه‌نفالكرییان دراگه‌هاندنه‌كێ دا دیاركر كو وهزارهتاوان هه‌ماهه‌نگى دگه‌ل وه‌زاره‌تا شه‌هیدێن عیراقێ كرییه بۆ ڤه‌گه‌راندنا روفاتێن ئه‌نفالكرییان به‌لێ ژماره‌كا په‌رله‌مانتارێن كورد ل به‌غدا كێشه بو وێ پروسێ درووستكرییه.
دراگه‌هاندنێ دا هاتییه ئه‌ڤه ده‌مه‌كه ژلایێ كه‌سوكارێن شه‌هید و قوربانیێن تاوانێن جینوسایدێ و رێكخراوێن كۆمه‌لگه‌ها مه‌ده‌نى پسیار دهێته كرن سه‌باره‌ت روفاتێن قوربانیێن تاوانێن ئه‌نفالان كو ل گورێن ب كۆم ل باشوورێ عیراقێ هاتینه بن ئاخكرن، ئاماژه ب وێ چه‌ندێ ژى كر هه‌ر ژ ده‌ستپێكا ده‌ستبكاربوونا كابینا نه‌هێ یاحكومه‌تا هه‌رێما كوردستانێ وه‌زاره‌تا كاروبارێن شه‌هید و ئه‌نفالكرییان ئه‌ركێ ل دوفچوونا چاره‌نڤیسێ قوربانیێن وێ تاوانێ ودیتنا گورێن ب كۆم وهه‌لدانا وان گوران دچوارچووڤێ تیما نیشتیمانى یا هه‌لدانا گورێن ب كۆم یێن عیراقێ وئینانا روفاتێن شه‌هیدان بو كوردستانی كرییه پێشینه‌یا كارێن خو.
ل دووف راگه‌هاندنێ ل سالا 2019ێ و ل ده‌مێ دیتنا ژماره‌كا گورێن ب كۆم ل بیابانێن سه‌ماوه رێڤه‌به‌رییا گورێن ب كۆم یێن وه‌زاره‌تێ ب هه‌ماهه‌نگییا ده‌زگه‌هێ شه‌هیدێن عیراقێ تیمێن خوه هنارتنه جهێن وان گوران و دهه‌لدانا وان دا پشكداربوون و ڤه‌گوهاستنا روفاتێن 171 شه‌هیدێن جینوسایدكرى بۆ نوشدارییا داد ل به‌غدا ب مه‌ره‌ما ئه‌نجامدانا رێكارێن یاسایی وزانستى و ئینانا وان بۆ كوردستانێ.
وه‌زاره‌تا كاروبارێن شه‌هید و ئه‌نفالكرییان دیار ژى كر، ژ ئه‌گه‌رێ به‌لاڤبوونا ڤایروسێ كورۆنا بۆ ده‌مه‌كى ئه‌و كاره هاته پاشخستن و پاش ب هه‌ماهه‌نگى دگه‌ل لایه‌نێن په‌یوه‌ندیدار یێن حكومه‌تا هه‌رێما كوردستانی ئاماده‌كاریێن پێدڤى بو ئینانه‌ڤه‌یا روفاتان و ڤه‌شارتنا وان دناف ئاخا وان دا ب شانازیڤه هاتنه كرن، و بۆ ڤێ مه‌ره‌مێ شاندێ وه‌زاره‌تێ و نوشدارییا داد یا هه‌ولێرێ دهه‌یڤا ئادارا ئه‌ڤ ساله‌دا سه‌ره‌دانا ده‌زگه‌هێ شه‌هیدێن عیراقێ كر و دانوستاندن لسه‌ر ڤى بابه‌تى هاتییه كرن و بریار هاته دان ل ده‌مه‌كێ نێزیك و د رێوره‌سمه‌كێ ژهه‌ژى دا ئه‌و ئه‌ركێ نیشتیمانى بگه‌هیته ئه‌نجام.
