ل به‌رده‌ره‌شێ نێزیكى حه‌فت هزار دونه‌مێن زه‌ڤییان برنج لێ هاتییه‌ چاندن

كابینه‌یا نه‌هێ یا حكومه‌تا هه‌رێما كوردستانێ ده‌رفه‌ته‌كا باشتر بۆ جووتیارێن هه‌رێما كوردستانێ بۆ چاندن و ساخكرنا به‌رهه‌مێن وان په‌یداكرییه‌، و ئه‌ڤه‌ ده‌رفه‌ته‌ بوویه‌ ئه‌گه‌ر كو جووتیارێن قه‌زا به‌رده‌ره‌شێ زێده‌تر گرنگییێ ب كه‌رتێ چاندنێ بده‌ن.

 ئه‌ڤ ساله‌ نێزیكى حه‌فت هزار دونه‌مێن زه‌ڤییێن قه‌زا به‌رده‌ره‌ش برنجێ كوردى لێ هاتییه‌ چاندن، و پێشبینى دهێته‌كرن به‌رهه‌مێ برنجێ كوردى بۆ ئه‌ڤه‌ ساله‌ نێزیكى 14 هزار ته‌نان بیت، گه‌له‌ك جۆرێن برنجێ كوردى ل به‌رده‌ره‌شێ هاتینه‌ چاندن، وه‌كو برنجێ شه‌ش هه‌یڤى، برنجێ سێ هه‌یڤى، برنجێ سه‌درى، برنجێ عه‌مبه‌ر و گه‌له‌ك جۆرێن دى.

سنۆرێ قه‌زا به‌رده‌ره‌ش ژلایێ ئه‌ردی ڤه‌ باشترین ئه‌رده‌ ل سه‌ر ئاستێ هه‌رێما كوردستانێ بۆ كه‌رتێ چاندنێ، و ژلایێ ئاڤا ل بن ئه‌ردى ژى ڤه‌ ل سنۆرێ پارێزگه‌ها دهۆكێ ل رێزا ئێكێ دهێت، و ئه‌و به‌رهه‌مێن هه‌تا نوكه‌ ل ڤێ ده‌ڤه‌رێ هاتینه‌ چاندن، به‌هرا پترا وان ب ئاڤا ل بن ئه‌ردى هاتینه‌ ئاڤدان و به‌رهه‌مێ وان بۆ بازارى دهێته‌ هنارتن.