دوماهی ژڤان بۆ تاپۆکرنا خانیێن زێدەگاڤی 9-9-2022 یێ یە

رێڤه‌به‌ریا گشتیا باژێرڤانیان ل پارێزگه‌ها دهۆكێ‌ راگەهاند، ل گۆره‌ی رێنمایێن وه‌زاره‌تا شاره‌وانی، دوماهیک ژڤان بۆ تاپۆ کرنا وان خانیێن ب شێوەیێ زێدەگاڤی هاتینە دروستکرن و دکەڤنە د چارچۆڤێ یاسایا زێدەگاڤیان دا رێکەفتی 9/9/2022یە و پشتی ڤێ رێکەفتێ ئێدی دێ ژ ڤی مافێ یاسایی بێبار بن. وەزارەتا شارەوانی و گەشت و گوزار داخوازێژ هاولاتیان دکەت ب زیترین دەم داخوازیێن خوە پێشکێشی لیژنەیا تایبەتمەند ل قەزا و ناحیا بکەن، ژ بۆی کو ژ ڤێ دەرفەتێ مفادار بن ژبەرکو ب تنێ هەیڤەک مایە.
ل گۆری بریارا ئەنجوومەنێ وەزیران یا هەرێما کوردستانێ، هەموو ئەو خانیێن ب زێدەگاڤی پێش رێکەفتی 31/12/2021ێ هاتینە ئاڤاکرن، ل گۆری یاسایا هەموارکری یا ژمارە 7 یا سالا 2021ێ هاتیە پەسەندکرن دێ هێنە تاپۆکرن، هەر خانیەک ژی پێش ڤێ رێکەفتێ ب شێوازێ زێدەگاڤی هاتبنە ئاڤاکرن، رێنماییێن تاپۆکرنێ وان ڤەدگریت.
رێنماییێن یاسایی ب ڤی رەنگینە:
دەما سێ سالانە یاسایا تاپۆکرنا وان ئەردێن کو زێدەرگاڤی ل سەر هاتنە کرن ل سنۆرێ باژێرڤانیان ژمارە 3 یا سالا 2019ێ هەموارکی ب یاسایا ژمارە 7 یا سالا 2021ێ دەرچوویە و دەما پێشکێشکرنا داخوازیێ ژ لایێ هاولاتیان ڤە ب پشتبەستن ب ماددەیا 2 ژ یاسایێ، وەک مەرجەک دەستنیشانکری کو زێدەگاڤیکەر پێویستە داخوازیا تاپۆکرنێ پێشکێش بکەت. ب تنێ پێشکێشکرنا ڤێ داخوازیێ د دەما دیارکری دا مافێن تەمام ژ بۆ زێدەگاڤیکەری دەستەبەر دکەت بۆ هندێ کو مفادار بیت ژ یاسایێ. واتە رێکارێن دی یێن ب ناڤ کرنێ و ئەو کێشەیێن ل جێبەجێکرنا رێکاران دهێنە پێش، نابنە رێگر ژ مفاداربوونا زێدەگاڤیکەری د یاسایێ دا. ژ بۆ کو هاولاتی داخوازێ د دەما یاساییی دا پێشکێش بکەت و ڤێ دەرفەتێ ژ دەتس نەدەت کو دوماهیک دەرفەتە بۆ مفاوەرگرتنێ ژ ڤێ یاسایێ و رووبروویێ جێبەجێکرنا یاسایا ژمارە 3 یا سالا 2018ێ یا تایبەت ب نەهێلانا زێدەگاڤیان نەبت، پێدڤیە ل سەر لیژنەیێن هاتینە پێکئینان ل پارێزگەهان و یەکەیێن ئیداری وەکو دەستپێک ڤان داخوازیان ب شێوەیەکێ فەرمی ژ هاولاتیان وەربگرن، پاشێ داخوازا داتا و پێتڤیاتێن تاپۆکرنێ بکەن.