سه‌رۆك بارزانى پێشوازی ل بالیۆزێ ئێكه‌تییا ئورۆپا ل عیراقێ كر

سه‌رۆك مه‌سعود بارزانى پێشوازی ل‌ بالیۆزێ ئێكه‌تییا ئورۆپا ل عیراقێ كر.

ئه‌ڤرۆ چارشه‌مبی 7/9/ 2022 ێ ل سەلاحەدین، سەرۆك بارزانی پێشوازی ل ڤیلە ڤاریۆلا، بالیۆزێ ئێكه‌تییا ئورۆپا ل عیراقێ و شاندێ ل گه‌ل دا كر، د وێ دیدارێ دا بالیۆزێ ئێكه‌تییا ئورۆپا ڕاگەهاند” ئێكه‌تییا ئورۆپا گرنگییێ ب هەرێما كوردستانێ دده‌ت و ڕۆلێ هەرێما كوردستانێ بۆ پاراستنا سەقامگیرییا عێراقێ و ڤێ ده‌ڤه‌رێ بلند د نرخینیت، گۆت ژی: ئێكه‌تییا ئورۆپا بڕیار دایە نوونەراتییا خۆ به‌رفره‌هتر لێ بكه‌ت و نوونەراتییه‌كا هەمیشەیی ل هەرێمی كوردستانێ دا دابمەزرینیت.

بالیۆزێ ئێكه‌تییا ئورۆپا دووپاتی ل سه‌ر دەستووری و دیالۆگێ وەك بنەمایێ چارەسەرییا كێشان كر، هه‌روه‌سا پێزانین بۆ ڕۆلێ سەرۆك بارزانی بۆ لێك نێزیككرنا لایەنێن عێراقی هەبوو و پشته‌ڤانییا ئیكه‌تییا ئورۆپا بۆ ئەنجامدانا هەڵبژارتنێن هەرێما كوردستانێ ڕاگەهاند.

د وێ دیدارێ دا سەرۆك بارزانی خۆشحاڵییا خۆ بۆ بڕیارا ئێكه‌تییا ئورۆپا بۆ ڤه‌كرنا نوونەرایەتییا هەمیشەیی یا ئێكه‌تییا ئورۆپا ل هەرێما كوردستانێ نیشان دا، گۆت ژی: پارتی دیموكراتی كوردستان ل گەل هندێ یه‌ كو هەڵبژارتنێن هەرێما كوردستانێ ب زووترین ده‌م بهینه‌ ئه‌نجامدان و داخواز كر كو جڤاكێ ناڤده‌وله‌تی بۆ هاریكاری و چاڤدێریكرنا هەڵبژارتنێن هەرێما كوردستانێ ڕۆل هەبیت.

سەرۆك بارزانی گۆت ژی: هۆكارێن ژێك دووركه‌فتنێ و قەیرانێن سیاسیی یێن عێراقێ پابەند نەبوونە ب دەستووری و هەر حكوومەتا د داهاتی دا ل عێراقێ بهێته‌ پێكئینان، دڤێت ل سەر بنەمایێ بەرنامەكێ به‌رفره‌هـ و ب هێز و پاراستنا مافێن هەرێما كوردستانێ و لبه‌رچاڤ وه‌رگرتنا پڕەنسیپێن شەراكەتێ و هه‌ڤسەنگی و سازانێ، د كڤانێ دەستووری و دیالۆگێ دا بیت.