ئه‌ڤرۆ حه‌فتى ئه‌یلولا 2022ێ سه‌رۆكێ هه‌رێما كوردستانێ نێچیرڤان بارزانى پێشوازى ل هاریكارا وه‌زیرێ ده‌رڤه یێ ئه‌مریكا بو كاروبارێن رۆژهه‌لاتا ناڤین باربارا لیڤ و شاندێ دگه‌لدا كر.
د دیداره‌كێ دا كو بالیۆزا ئه‌مریكا ئالینا رۆمانوسكى و كونسۆلێ گشتى یێ ئه‌مریكا ل هه‌رێما كوردستانێ و ژماره‌كا دیپلۆماتكارێن ئه‌مریكى تێدا دبه‌رهه‌ڤبوون، په‌یوه‌ندییێن ئه‌مریكا دگه‌ل عیراق و هه‌رێما كوردستانێ، دووماهى پێشهاتێن ره‌وشا سیاسى یا عیراقێ، بزاڤێن ده‌ربازكرنا ئالوزییان، و په‌یوه‌ندییێن هه‌ولێر و به‌غدا و كێشه‌یێن دناڤبه‌را واندا هاتنه گوتوبێژكرن.
دهه‌مان دیداردا باربارا لیڤێ سلاڤ و رێزێن سه‌رۆكێ ئه‌مریكا جۆ بایدنى ب نێچیرڤان بارزانى گه‌هاندن و دیاركر، ئه‌و بۆ دووپاتكرنا پابه‌ندبوونا ئه‌مریكا ب په‌یوه‌ندییێن دگه‌ل عیراق و هه‌رێما كوردستانێ هاتینه هه‌رێمێ، و ئه‌مریكا ئه‌وان په‌یوه‌ندییان ب گرنگییه‌كا مه‌زنڤه وه‌ردگریت، و هه‌موو پشته‌ڤانییا وه‌لاتێ خوه بۆ به‌رقه‌راربوونا ئارامى و سه‌قامگێرییا سیاسى ل عیراقێ نیشاندا.
ژلایێ خۆڤه سه‌رۆك نێچیرڤان بارزانى زێده‌بارى سوپاسى و پێزانینان بۆ هاریكارى و پشته‌ڤانییا ئه‌مریكا ل عیراق و هه‌رێما كوردستانێ دووپاتكر، كێشه‌ییێن عیراقێ ب پشتگوهـ خستنا لایه‌نێن سیاسى چاره‌سه‌ر نابن، و پێدڤییه هه‌موو پێكهاته‌یێن عیراقێ ب دانوستاندن و لێكتێگه‌هشتنێ شێوازه‌كى بۆ پێكڤه‌ژیانێ په‌یدابكه‌ن.
هه‌روه‌سا نێچیرڤان بارزانى د دیدارێ دا دیاركر، هه‌بوونا قانوونا دابه‌شكرنا داهاتێن نه‌فت و گازێ، كلیلا چاره‌سه‌ركرنا بابه‌تێن هه‌ولێر و به‌غدا و كێشه‌یێن ئارامى و سه‌قامگێرییا سیاسى یا وه‌لاتى نه، و عیراق بۆ چاره‌سه‌ركرنا كێشه‌یێن خوه، پێدڤى ب دانوستاندن و لێك تێگه‌هشتنا لایه‌نێن سیاسى و پێكهاته و پشته‌ڤانییا وه‌لاتێن هه‌ڤال هه‌یه.
