سەرۆكێ هەرێما كوردستانێ ب هەلكەفتا سالرۆژا شۆرەشا ئیلۆنێ پەیامەك بەلاڤكر و راگەهاند، شۆرەشا ئیلۆنێ بۆ هەمی جیهانێ دیاركر كۆ چ هێزەكا سەربازی نەشێت ئیرادا گەلێ كوردستانێ بۆ ژیان و ئازادییێ بشكێنیت.
دەقێ پەیاما سەرۆكێ هەرێمێ:
ئەڤرۆ ب رێزڤە یادا شێست و ئێك سالیا شۆرەشا مەزن یا ئیلۆنێ و رێبەرێ شۆرەشێ بارزانییێ نەمر و وان هەمی قارەمانان دكەین یێن ل پێناڤی ئازادییا گەل و وەلاتێ خۆە گیانێ خۆە بەخشی. سلاڤان بۆ خێزانێن سەربەرزێن شەهیدان و هەمی وان پێشمەرگە و خەباتكەران دهنێرین یێن د رۆژێن سەخت و دژوار یێن شۆرەشێدا دلسۆزانە خزمەت كری.
شۆرەشا ئیلۆنێ، ڤەگەراندنا ناسناما نەتەوەی یا گەلێ كوردستانێ بوو، شۆرەشا هەمی لایەن و پێكهاتێن كوردستانێ بوو كۆ ل ژێر رابەرایەتی و سەركردایەتییا ئێكگرتیدا هەمی هاتنە كۆمكرن. د ئێك ژ دژوارترین قۆناغێن دیرۆكا گەلێ كوردستانێ و دەڤەرێ دا، ب ئیرادە و باوەرییەكا پولایین روویبرووی دوژمنی بوو. دەولەتا عیراقێ نەچاركر دانپدانێ ب مافێن گەلێ كوردستانێ بكەت و ببیتە بناغەیەك بۆ هەمی دەستكەفتێن ددویڤدا. نموونەیەكا جوانتر یا شورەشێ ئەو بوو كۆ د سەركەفتنێ دا ل خوبایی نەبوو، بەلكو سەركەفتن كرە دەرفەتەكا زێدەتر یا لێبورینێ و خەباتا هەڤپشك و ئێك خستنا زێدەتر یا ناڤمالا كوردستانیییان.
شۆرەشا ئیلۆنێ بۆ دۆست و نەیار و هەمی جیهانێ سەلماند كۆ چ هێزەكا سەربازی نەشێت ئیرادا گەلێ كوردستانێ بۆ ژیانێ و ئازادییێ بشكێنیت. نهێنی و هێزا سەركەفتنا شورەشێ، تەبایى و ئێكرێزییا هەمی پێكهاتێن گەلێ كوردستانێ بوو، د ڤێ یادێ دا، دۆپاتییێ ل ئێكرێزی و تەبایی یا دناڤبەرا هەمی پێكهاتە و هێزێن سیاسی یێن كوردستانێ دكەین.
ئەو تاكە رێكا پاراستنا ماف و دەستكەفتێن دەستووری یێن هەرێما كوردستانێ و چەسپاندنا سیستەمێ فیدرالی و داهاتوویەكێ باشترە.
شكورداربیت یادا شۆرەشا مەزن یا ئیلونێ و سلاڤ بۆ گیانێ پاك یێ شەهیدان.
نێچیرڤان بارزانی
سەرۆكێ هەرێما كوردستانێ
Like this:
Like Loading...
