ل شنگالێ سێ كه‌س بوونه‌ قۆربانییێن فرۆكه‌یێن بێ فرۆكه‌ڤان

ژێده‌ره‌كى بۆ ئاژانسا خانى دیاركر، ل شنگالێ فرۆكه‌یه‌كا بێ فرۆ‌كه‌ڤان ترومبێله‌ك كره‌ ئارمانج  و دئه‌نجامدا سێ كه‌سان گیانێ خوه‌ ژده‌ست دا، و میدیایێن په‌كه‌كێ ژێ رادگه‌هینن ئه‌و ترومبێلا بوویه‌ ئارمانج یا هێزێن یه‌كینه‌یێن به‌رخۆدانا شنگالێ  یه‌په‌شێ بوون و ئاما‌ژه‌ ب هندێ كر، پشتی چه‌ند ده‌مژمێرێن بهێن یه‌په‌شه‌ ب خوه‌ دێ راگه‌هاندنه‌كێ ل دۆر ڤێ روودانێ به‌لاڤكه‌ت.

هه‌روه‌سا دژه‌ تیرورا كوردستانێ ژی راگه‌هاند، ئه‌و روودانه‌ ل ده‌مژمێر 10:50 به‌ری نیڤرۆ یا روژا ئێك شه‌مبی بوو، فرۆكه‌ یا بێ فرۆكه‌ڤان یا توركیا دناڤبه‌را هه‌ردوو گوندێن بارا و به‌هراڤا سه‌ر ب ناحییا شیمال یا قه‌زایا شنگالێ دا ترومبێله‌ك كره‌ ئارمانج و ب گوتنا ئه‌وان، سێ چه‌كدارێن په‌كه‌كێ تێدابوون، دوو ژ وانا هاتینه‌ كوشتن و ئێك ژی برینداره‌.

روژا ئێك شه‌مبێ 11-9-2022  حه‌یده‌ر شه‌شۆ فه‌رماندێ هێزێن پاراستنا ئێزیدخانێ، ب ئێك ژ ده‌زگه‌هێن راگه‌هاندێ گۆت: ل دووف وان زانیاریێن گه‌هشتینه‌ مه،‌ سێ كه‌س دوێ ترومبێلێ دا بوون ب مخابنى ڤه‌ هه‌رسێ كه‌س بوونه‌ قۆربان، و ئێك ژوانا خه‌لكێ شنگالێ یه‌.

دهێته‌ زانین هه‌تا نوكه‌ توركیا چه‌ندین جاران هێزێن په‌كه‌كێ و نێزیك ژ په‌كه‌كێ ل ده‌وروبه‌رێن شنگالێ كرینه‌ ئارمانج و پترییا هێرشێن وێ قوربانی ل دووف خوه‌ هێلاینه‌.