پەیڤدارێ وەزارەتا چاندنێ: ل ھەیڤا بهێت دێ تۆڤێ گەنمی ھێتە بەلاڤکرن

ئاژانسا خانی ” تایبەت:

پەیڤدارێ وەزارەتا چاندنێ ئاشکرا کر، بڕیارە ل ھەیڤا بهێت تۆڤێ گەنمی ل سەر جووتیاران بھێتە بەلاڤکرن و لدووڤ پلانا وەزارەتێ ژی سالێن بھێت ھەرێما کوردستانێ پێدڤی ب تۆڤێ دەرڤە نابیت ژبەر بەرھەم ئینانا تۆڤێ ناڤخۆیی.

حسێن حەمە کەریم، زێده‌تر بۆ ئاژانسا خانی دیار کر” ل سالا بوری پێنج ھزار تەنێن تۆڤێ گەنمی ل سەر جووتیاران ھاتینە بەلاڤکرن، بەلێ ئەڤ سالە ھاتییە زێدەکرن بۆ حەفت ھزار و ٥٠٠ تەنان، بڕیارە ل ھەیڤا بهێت تۆڤێ گەنمی ل سەر جووتیاران بھێتە بەلاڤکرن، گەنمێ بەلاڤکرنێ ڤەکۆلین ل سەر ھاتینە کرن و لدووڤ رەوشا سەقایێ ھەر دەڤەرەکێ ھاتییە دیارکرن.

حسێن حەمە کەریم گۆت ژی” وەزارەتا چاندنێ بزاڤان دکەت سال بۆ سالێ تۆڤێ گەنمی بەرھەم بینیت و ل چەند سالێن بھێت بەھرا ھەموو جووتیاران دێ تۆڤێ گەنمی ھەبیت، واتە ھەرێما کوردستانێ ئیدی پێدڤی ب ئینانا تۆڤێ دەرڤە نابیت، ئەڤە ژی پێنگاڤەکا گرنگە بۆ کەرتێ چاندنێ ل ھەرێما کوردستانێ، مخابن ژبەر رەوشا ئابووری وەزارەت نەشێت ھاریکاریێن زێدەتر پێشکێشی جووتیاران بکەت بۆ وەرزێ چاندنێ.