رێكخراوا بهرهنگاربوونا توندوتیژییا ب رێكا چهك و تهقهمهنییان كو بنگههێ وێ یێ سهرهكى ل بریتانیایه، راپۆرتهك ل دوور وێ توندوتیژییێ بهلاڤكر یاكو ل ههیڤا تهباخا بووری ب رێكا چهك و تهقهمهنییان هاتییه كرن و ل دووڤ وێ راپۆرتێ، پشتى ئوكرانیا كو شهر تێدا دهێتهكرن، عیراق و سووریا ل رێزێن دووێ و سێیێ دهێن.
رێكخراوا بریتانى بهحس ل وێ چهندێ كر، ل ههیڤا تهباخێ د 454 رووداناندا ل سهرانسهرى جیهانێ، سێ هزار و 196 كهس هاتینه كوشتن و برینداركرن و 65%ێ ژ وان كو دبنه ( دو هزار و 67 كهس ) خهلكێ سڤیل بوون.
رێزا ئێكێ : ئوكرانیا
ل دووڤ راپۆرتێ، ل ههیڤا تهباخا بوورى 205 كهسێن سڤیلان ژبهر روودانێن پهقین و تهقهكرنێ گیانێ خوه ژ دهستداینه و 553 كهسێن دیژى برینداربووینه و 35 زارۆك و 62 ژن دناڤ كوشتى و برینداران دا ههبوون.
رێزا دووێ : عیراق
دراپۆرتێدا هاتییه عیراق ل رێزا دووێ یا وان وهلاتان دهێت یێن پترین توندوتیژییا چهكى تێدا هاتییه كرن ب جۆرهكى ب تنێ ل ههیڤا تهباخێ 22 روودانێن تهقهكرن و پهقینان هاتینه تۆماركرن، كو شهش ژ وان روودانان بوونه ئهگهرێ كوشتنا 32 كهسێن سڤیل و برینداربوونا 492 سڤیلێن دى، ههروهسا 28 كهس درووبرووبوونا هێزێن چهكدار دا هاتنه كوشتن.
ل دووڤ راپۆرتێ، كوشتن و برینداربوونا سڤیلان 90%ێ یا قوربانییێن پێكدادان و توندوتیژییا چهك و تهقهمهنییان ل عیراقێ پێكدهێت، و 99%ێ یا قوربانیییێن توندوتیژییێ ل باژێران بوون و ب تنێ 1%ێ ل گوندان بوو.
ل سهرانسهرى عیراقێ 443 كوشتى و بریندارێن سڤیل ههنه، راپۆرتێ ئاماژه ب وان جهان دا یێن ئهو كهسه لێ هاتینه كوشتن و برینداركرن و دیاركر، پترین روودانێن تهقهكرن و پهقینان ل بهغدا هاتینه تۆماركرن كو 429 روودان بوون، پشتى وێ باژێرێ ههولێر دهێت كو پێنج كهس هاتینه كوشتن و برینداركرن، ل نهینهوا چار كهس، ل دیالا چار كهس و ل كهركووكێ ژى كهسهكێ سڤیل ب ئهگهرێ روودانێن تهقهكرنێ بووینه قوربانى.
رێزا سێیێ : سووریا
راپۆرتێ ئاشكراكر، سووریا ل رێزا سێیێ یا وان وهلاتان دهێت یێن كو پترین توندوتیژییا چهكى تێدا هاتییه كرن، ب جۆرهكى كو ل ههیڤا تهباخێ 70 روودانێن تهقهكرن و پهقینان هاتینه تۆماركرن و 35 ژ وان روودانان بوونه ئهگهرێ كوشتنا 37 كهسێن سڤیل و برینداربوونا 133 سڤیلێن دى.
زێدهتر وێ راپۆرتێ دیاركر، 64 كهسێن دى درووبرووبوونا هێزێن چهكدار دا هاتینه كوشتن، ههروهسا دراپۆرتێدا هاتییه، كوشتن و برینداربوونا سڤیلان 59%ێ یا قوربانییێن پێكدادان و توندوتیژییا چهك و تهقهمهنییان ل سووریا پێكدهێت.
