عیراقێ یاداشته‌كا نه‌رازیبوونێ یا توند گه‌هانده‌ بالیۆزێ ئیرانێ ل به‌غدا

وه‌زاره‌تا ده‌رڤه‌ یا عیراقێ بالیۆزێ كۆمارا ئیسلامى یا ئیرانێ ل به‌غدا گازیكر و یاداشته‌كا نه‌رازیبوونێ یا توند پێشكێشى وى كر.

ل دووڤ راگه‌هاندنه‌كا وه‌زارتا ده‌رڤه‌ یا عیراقێ، ئه‌ڤرۆ 29ى ئه‌یلولا 2022ێ بالیۆزێ ئیرانێ ل به‌غدا محه‌مه‌د كازم ئه‌لسادق ژبه‌ر تۆپباران و بوردومانێن مووشه‌كى و ئاسمانى یێن ئیرانێ بۆ سه‌ر هه‌رێما كوردستانێ هاته‌ گازیكرن و ژلایێ به‌رپرسێ فه‌رمانگه‌ها وه‌لاتێن جیران ئیحسان عه‌وادیڤه‌ دانوستاندن دگه‌لدا هاتنه‌كرن.

هه‌روه‌سا دراگه‌هاندنێدا هاتییه‌، وه‌زاره‌تا ده‌رڤه‌ یا عیراقێ یاداشته‌كا نه‌رازیبوونێ یا توند پێشكێش كر كو تێدا حكومه‌تا عیراقێ ئه‌و تاوانه‌ ئیدانه‌كر و ب به‌رده‌وامییا ده‌ستدرێژییێن ئیرانێ بۆ سه‌ر سه‌روه‌رییا عیراقێ و ئه‌ردێ وێ ل قه‌له‌مدا، و وه‌سا دیاركر ئێدى دشیاندا نینه‌ ل سه‌ر ئه‌ڤان هێرشان خوه‌ بێده‌نگ بكه‌ن.

وه‌زاره‌تا ده‌رڤه‌ یا عیراقێ ئه‌ڤ كاره‌ دیاداشتا خوه‌دا ره‌تكرن و دووپاتكر، ئه‌ڤ كاره‌ وه‌لاتییان دكه‌ته‌ قوربانى و داخواز ژ ئیرانێ كر رێزێ ل سه‌روه‌رییا عیراقێ بگریت و پابه‌ندى سۆزنامه‌یا ئیرانێ دگه‌ل په‌یمانێن نێڤده‌وله‌تى بیت و خوه‌ ژ لڤینێن له‌شكه‌رى و زمانێ چه‌كى دوور بكه‌ت، و هوشدارى ب ئیرانێ دایه،‌ به‌رده‌وامبوونا ئه‌ڤان جۆره‌ هێرشان دێ كارتێكرن ل سه‌ر ئاشتییا جڤاكى و ئاسایش و سه‌قامگێرییا هه‌ردوو وه‌لاتان هه‌بیت.