مه‌سرور بارزانی پێشوازی ل‌ سه‌رۆكێ لژنا په‌یوه‌ندی یێن ده‌رڤه‌ یا جڤاتا  پیرێن فره‌نسا كر

مه‌سرور بارزانى سه‌رۆكێ حكومه‌تا هه‌رێما كوردستانێ ئه‌ڤرۆ پێشوازى ل سیناتۆر كریستیان كامبۆن سه‌رۆكێ لژنا په‌یوه‌ندیێن ده‌رڤه‌ و به‌رگرى و هێزێن چه‌كدارى ل جڤاتا پیرێن فره‌نسا ( سێنات) كر.

 د وێ كۆمبوونێ دا، داوى گوهۆرین و پێشهاتێن ره‌وشا گشتى یا عیراق و ده‌ڤه‌رێ و گرنگی پێدانا په‌یوه‌ندی یێن فره‌نسا و هه‌رێما كوردستانێ گۆتوبێژ كرن.

سه‌رۆكێ لژنا په‌یوه‌ندیێن ده‌رڤه‌ و به‌رگرى و هێزێن چه‌كدارى ل جڤاتا پیرێن فره‌نسا، خوشحالییا خو بۆ دوباره سه‌ره‌دانا خوه‌ بۆ هه‌رێمێ ده‌ربرى و ئاماژه‌ كر، هه‌ر جاره‌كا سه‌ره‌دانا هه‌ولێر و هه‌رێمێ دكه‌ت پێشكه‌فتنا به‌چاڤ دبینیت و ئاما ده‌یا وه‌لاتێ خوه‌ بۆ گرنگیدان بۆ په‌یوه‌ندی یێن هه‌مى لایانڤه‌، ب تایبه‌ت هه‌ماهه‌نگییا ئه‌منى و به‌رگرى ل گه‌ل هه‌رێما كوردستانێ ده‌ربرى، هه‌روه‌سا مه‌دالیا رێزلێنانا جڤاتا پیرێن فره‌نسا، پێشكێش كر.

سه‌رۆكێ حكومه‌تا هه‌رێما كوردستانێ، سوپاسیا حكومه‌ت و خه‌لكێ فره‌نسا كر، كو د رۆژانێن ب زه‌حمه‌تدا، پشته‌ڤانیا گه‌لێ كوردستانێ كرییه‌، خاستا هه‌رێما كوردستانێ بۆ پێشڤه‌برنا په‌یوه‌ندی یێن زێده‌تر دگه‌ل فره‌نسا دوپاتكر.

مه‌سرور بارزانى گۆت ژى، چاكسازییا كابینا نه‌هێ یا حكومه‌تا هه‌رێما كوردستانێ و گرنگییا چاره‌سه‌ركرنا ئاریشێن هه‌رێمێ و حكومه‌تا فیدرال و پاراستن و رێزگرتن ل مافێن ده‌ستوورى یێن خه‌لكێ كوردستانێ، ئێك ژ ته‌وه‌رێن دى یێن وێ كۆمبوونێ بوو.