داخوازا کۆمبوونەکا ب لەز یا پەرلەمانێ عێراقێ هاتییه‌ کرن

ئاژانسا خانی ” تایبەت:

ھژمارەکا پەرلەمانتارێن عیراقێ ب رێیا یاداشتەکێ داخوازا کۆمبوونەکا ب لەز یا پەرلەمانێ عێراقێ كرییه‌ و پەرلەمانتارەکا پارتی ژی دبێژیت، پێدڤییە حوکمەتا عێراقێ ھەلویست ھەبیت ل ھەمبەر ھێرشێن ئیرانێ بۆ سەر ھەرێما کوردستانێ.

جوان عەبدولا، پەرلەمانتارا پارتی بۆ ئاژانسا خانی دیار کر” ئەو یاداشت ژلایێ ١٢٥ پەرلەمانتاران ڤه‌ ھاتییە ئیمزا کرن و پێشکێشی دەستەیا سەرۆکاتییا پەرلەمانێ عێراقێ ھاتییە کرن، داكو ب زووترین ده‌م کۆمبوونەکا تایبەت لدۆر دەستدرێژیێن ئیرانێ بۆسەر ھەرێما کوردستانێ بھێتە ئەنجامدان و تێدا رێکارێن قانوونی و ده‌ستووری بۆ راگرتنا وان ھێرشان ھەبن، چونکی بەردەوام خەلکێ سڤیل دبیتە قوربانی و سەروەریا ئاخا عێراقێ دھێتە بنپێکرن.

ناڤهاتییێ گۆت ژی” ئەرکێ حوکمەتا عێراقێیە رێكارێن ده‌ستووری و نێڤدەولەتی بگریتەبەر بەرامبەری وان ھێرشێن دھێنە کرن، ھەروەسا لایەنێن نێڤدەولەتی وەکی جڤاتا ئاسایشێ بھێتە ئاگەھدار کرن و سنۆرەکێ بۆ بنپێکرنا سەروەرییا عێراقێ بھێتە دانان، مخابن ھەتا نوکە ھەلویستێ حوکمەتا عێراقێ وەک پێدڤی نینە ل ھەمبەر ھێرشێن ئیرانێ.