پەرلەمانێ عیراقێ دێ پڕۆژە قانوونا بودجەیی بەرھەڤ کەت

ئاژانسا خانی ” تایبەت:

لژنا دارایی ل پەرلەمانێ عێراقێ بەرھەڤییان بۆ پڕۆژە قانوونا بودجێ سالا ٢٠٢٣ ێ دکەت و پەرلەمانتارەک ژی ئاشکرا دكه‌ت، چەندین پڕۆژە قانوون دێ ھێنە بەرھەڤکرن و پەسەند کرن و ئێک ژوان قانوونا بۆدجەیە.

د. نەھلە قادر، پەرلەمانتارا کورد ل پەرلەمانێ عێراقێ بۆ ئاژانسا خانی دیارکر” سەرەڕایی خۆنیشاندانان و ئالۆزی یێن عێراق تێدا دەرباز دبیت لژنێن ناڤا پەرلەمانی د بەردەوامن ل سەر برێڤەبرنا ئەرکێن خوە یێن رۆژانە و بەرھەڤکرنا پڕۆژە قانوونان ھەتا بکەڤنە ناڤا کارناما پەرلەمانی و بھێنە پەسەند کرن، ب تایبەتی ئەو پڕۆژە قانوونێن گرێدایی ژیانا خەلکێ عێراقێ، بەلێ ناھێتە ڤەشارتن تێکچوونا پرۆسا سیاسی کاریگەری ل سەر رێڤەچوونا کارێن پەرلەمانی ھەیە.

د. نەھلە قادر ئاشکراکر ژی” لژنا دارایی ل پەرلەمانێ عێراقێ مژوولی بەرھەڤکرنا پڕۆژە قانوونا بودجێ سالا داھاتییە، چونکی ئەڤ سالە عێراقێ قانوونا بودجەیی نەبوویە و ب تنێ قانوونا بودجێ ئاسایش و خوارنێ ھەبوویە ئەو ژی ھەیڤا دازدە دێ ب دووماھی ھێت و عیراقێ پێدڤی ب قانوونا بودجەیی ھەیە، ھەر دەمێ پڕۆژە ب دووماھی بھێت دێ کەڤیتە کارناما کۆمبوونێن پەرلەمانی و بھێتە پەسەند کرن.